Rihapja e Ngushticës së Hormuzit nga Irani po shihet si një sinjal pozitiv për ekonominë globale, pas javësh tensionesh që kanë ndikuar rëndë në furnizimin me naftë, gaz dhe materiale kimike.
Megjithatë, ekspertët paralajmërojnë se rikthimi në normalitet nuk do të jetë i shpejtë. Sipas korrespondentit diplomatik të BBC-së, Paul Adams, do të duhen më shumë se dy javë që trafiku detar të stabilizohet plotësisht në këtë zonë nevralgjike për tregtinë botërore.
Irani ka bërë të ditur se po vendos kushte dhe protokolle të reja për të garantuar sigurinë e lundrimit në këtë rrugë strategjike. Këto masa pritet të rregullojnë qarkullimin e cisternave që kishin mbetur të bllokuara si pasojë e konfliktit.
Kufizimet teknike dhe koordinimi ushtarak
Ndërkohë, Ministri i Jashtëm i Iranit, Abbas Aragchi, ka deklaruar se kalimi i sigurt do të lejohet gjatë dy javëve të ardhshme, në koordinim të ngushtë me forcat e armatosura dhe duke marrë parasysh „kufizimet teknike“.
Ky njoftim tregon se kthimi në situatën e paraluftës nuk pritet të ndodhë menjëherë. Tregjet ndërkombëtare mbeten në pritje të zbatimit të këtyre protokolleve, ndërsa rihapja po konsiderohet si hapi i parë drejt uljes së çmimeve të energjisë, të cilat shënuan rritje rekord gjatë muajit të kaluar.
