Bisedimet për zgjatjen e armëpushimit të Gazës kanë dështuar, ka thënë një zyrtar palestinez për BBC-në dhe kjo vjen pasi SHBA-ja akuzoi Hamasin se ka bërë kërkesa “krejtësisht jopraktike” në takimet në Katar.
Negociatorët janë përpjekur të gjejnë një rrugë përpara pas përfundimit të fazës së parë të armëpushimit të përkohshëm më 1 mars.
SHBA propozoi të zgjaste fazën e parë deri në mes të prillit, duke përfshirë një shkëmbim të mëtejshëm të pengjeve të mbajtura nga Hamasi dhe të burgosurve palestinezë të mbajtur nga Izraeli.
Por zyrtari palestinez i paidentifikuar tha se Izraeli dhe Hamasi nuk ranë dakord mbi aspektet kryesore të marrëveshjes të përcaktuara nga i dërguari i SHBA-së për Lindjen e Mesme, Steve Witkoff.
Izraeli ende nuk ka komentuar, por zyra e kryeministrit Benjamin Netanyahu tha se ai do të merrte një raport nga ekipi negociator i Izraelit më vonë të shtunën.
“Hamasi po bën një bast shumë të keq se mendon se koha është në anën e tij. Nuk është. Hamasi e di mirë afatin dhe duhet të dijë se ne do të përgjigjemi në përputhje me rrethanat nëse ai afat kalon”, thuhet në një deklaratë nga zyra e Witkoff dhe Këshilli i Sigurisë Kombëtare të SHBA-së të premten.
