Autoriteti Rrugor Shqiptar ka vendosur mbylljen e plotë të urës auto-hekurudhore të Milotit, me një gjatësi prej 788 metrash, pas konstatimit të dëmtimeve të konsiderueshme që përbëjnë rrezik serioz për qëndrueshmërinë dhe sigurinë e kalimit.
Sipas njoftimit zyrtar, ekspertiza teknike ka zbuluar probleme të theksuara në themelet mbështetëse të urës, erozion të avancuar në bazament si pasojë e shfrytëzimit të pakontrolluar të zhavorrit në shtratin e lumit, si dhe gërryerje të përgjithshme në të gjithë strukturën lumore.
Në kushtet e trafikut të rënduar, veçanërisht gjatë sezonit veror, autoritetet kanë marrë vendimin për të ndërprerë plotësisht qarkullimin mbi urë, deri në përfundimin e një ndërhyrjeje emergjente që aktualisht është në fazën e hartimit nga ARRSH në bashkëpunim me Universitetin Politeknik të Tiranës.
Ndërkohë, si pjesë e programit kombëtar “100 Ura”, i mbështetur nga Banka Botërore, është planifikuar edhe ndërtimi i një ure të re që do të zëvendësojë strukturën ekzistuese.
Për të lehtësuar lëvizjen gjatë kësaj periudhe, ARRSH u bën thirrje qytetarëve të përdorin rrugët alternative Lezhë-Milot dhe Rrugën e Kombit.
