Të paktën pesë persona humbën jetën të hënën pasi një avion i Marinës së Meksikës u rrëzua pranë Galveston, në shtetin amerikan të Texasit, konfirmuan zyrtarë amerikanë dhe meksikanë.
Avioni, një King Air (ANX 1209), po kryente një mision transporti mjekësor dhe kishte në bord tetë persona: katër pjesëtarë ushtarakë dhe katër civilë. Misioni ishte në koordinim me fondacionin Michou y Mau, një organizatë jofitimprurëse në Meksikë që ndihmon fëmijët me lëndime nga djegiet.
Dy persona i mbijetuan rrëzimit, ndërsa një tjetër u raportua i zhdukur. Gjendja e të mbijetuarve nuk u bë menjëherë e ditur. Shkaqet e aksidentit ende nuk janë përcaktuar dhe autoritetet kanë nisur hetimet.
Presidentja e Meksikës, Claudia Sheinbaum, shprehu ngushëllime për familjet e viktimave dhe tha se do të zhvillohet një hetim i plotë, ndërsa familjet po marrin mbështetjen e nevojshme.
Sipas të dhënave të fluturimit, avioni ishte nisur nga Aeroporti Ndërkombëtar i Mérida-s në Gadishullin e Jukatanit drejt Aeroportit Scholes në Galveston. Autoritetet raportuan se komunikimi me avionin u humb për disa minuta para se të identifikohej vendi i rrëzimit. Ekipet e shpëtimit, përfshirë edhe Rojet Bregdetare të SHBA-së, u angazhuan në operacionin e kërkim-shpëtimit në koordinim me palën meksikane.
