Një artikull i detajuar i gazetarit Ben Terris në New York Magazine ka rikthyer vëmendjen mbi gjendjen shëndetësore dhe energjinë e pazakontë të presidentit amerikan Donald Trump, duke zbuluar presionin që kjo u shkakton bashkëpunëtorëve të tij më të afërt.
Sipas Terris, Sekretari i Shtetit Marco Rubio – i cili njëkohësisht mban edhe postin e Këshilltarit për Siguri Kombëtare, për herë të parë pas Henry Kissingerit – e ka të vështirë të ndjekë ritmin e presidentit, sidomos gjatë udhëtimeve jashtë vendit. Ndryshe nga Trump, i cili nuk fle kurrë në Air Force One, Rubio pranon se ka nevojë për pushim.
“Ka dy sofa. Mbështillem me batanije në njërën dhe dukem si mumje,” ka thënë Rubio, duke shtuar se fshihet që Trump të mos e shohë duke fjetur. “E di që presidenti del nga dhoma dhe kontrollon kush është zgjuar. Nuk dua të më shohë duke fjetur e të mendojë: ‘Ky njeri është i dobët.’”
Artikulli thekson gjithashtu ndjeshmërinë e Trumpit ndaj raportimeve për shëndetin e tij. Terris citon presidentin të ketë thënë: “Nëse publikon një artikull të keq, do të të padis,” si dhe “Shkruaje pas pesë vitesh – askujt nuk do t’i interesojë.”
Zyrtarë të Shtëpisë së Bardhë përshkruajnë një president me energji të jashtëzakonshme. Zëvendës-zëdhënësja Karoline Leavitt tha se edhe personeli elitë ushtarak e ka të vështirë të përballojë orarin e tij, duke shtuar se marinsat që ruajnë Zyrën Ovale kanë kërkuar përforcime për ndërrimin e turneve për shkak të qëndrimeve të gjata të presidentit.
Drejtori i reagimit të shpejtë, Steven Cheung, tregoi se Trump nënshkruan ligje deri vonë në mbrëmje dhe rikthehet herët në mëngjes në Zyrën Ovale, duke pranuar se vetë ndihet i rraskapitur. Djali i presidentit, Eric Trump, deklaroi se nuk e ka parë kurrë babanë e tij të marrë pushime.
Ndërkohë, këshilltari i lartë Wil Sharp sqaroi pamjet ku Trump shihet me sy të mbyllur gjatë mbledhjeve, duke thënë se nuk bëhet fjalë për përgjumje, por për një qëndrim tipik kur ai mendon thellë. Kulmi i artikullit vjen nga një prej mjekëve të presidentit, kolonel James Johns, i cili deklaroi se Trump është më i shëndetshëm se ish-presidenti Barack Obama – një përgjigje që, sipas Terris, Trump e priti pa asnjë dyshim.
