Një avion luftarak rus Su-34 ka lëshuar aksidentalisht municion luftarak mbi qytetin rus Belgorod, duke shkaktuar shpërthime masive, evakuime të mijëra banorëve dhe një situatë kaosi total.
Një gabim i kushtueshëm dhe i turpshëm ushtarak ka tronditur Rusinë, kur një avion luftarak i tipit Sukhoi-34, gjatë një misioni drejt Ukrainës, hodhi aksidentalisht një bombë mbi qytetin kufitar rus, Belgorod. Shpërthimi ishte aq i fuqishëm sa krijoi një krater mbi 18 metra të gjerë dhe hodhi një makinë mbi çatinë e një dyqani aty pranë.
Ministria e Mbrojtjes e Rusisë u detyrua të pranonte incidentin, duke e cilësuar si një “shkarkim aksidental të municioneve të aviacionit”. Ky pranim i shpejtë erdhi pasi blogerët ushtarakë pro-Kremlinit fillimisht tentuan të fajësonin Ukrainën, duke bërë thirrje për “përgjigje edhe më të ashpra” ndaj Kievit, përpara se të zbulohej e vërteta e hidhur.
Situata u përkeqësua dy ditë më vonë, kur një bombë e dytë e pashpërthyer u zbulua pranë zonës së goditjes së parë. Kjo detyroi autoritetet të evakuonin rreth 3,000 banorë nga 17 ndërtesa banimi, duke shkaktuar panik masiv. Ndonëse zyrtarët nuk e konfirmuan zyrtarisht nëse bëhej fjalë për të njëjtin avion, lidhja mes dy ngjarjeve mbetet më se e qartë.
Ky nuk është incidenti i parë i paaftësisë ruse. Në tetor të vitit 2022, një avion lufte u rrëzua mbi një ndërtesa banimi në qytetin port të Yeysk gjatë një fluturimi stërvitor, duke lënë të vdekur 15 persona. Këto aksidente të njëpasnjëshme ngrenë dyshime të forta mbi gjendjen teknike të flotës ajrore ruse dhe stërvitjen e pilotëve.
Ekspertët vlerësojnë se pranimi i shpejtë i fajit nga Kremlini tregon se sulmet brenda territorit rus janë një pikë tejet e ndjeshme për udhëheqjen e vendit. Ndërsa lufta vazhdon, duket se banorët e qyteteve kufitare ruse po rrezikohen po aq shumë nga “zjarri miqësor” i forcave të tyre, sa edhe nga fronti i luftës.
