Sulmet me raketa dhe dronë të Rusisë gjatë natës në kryeqytetin ukrainas, Kiev, kanë vrarë të paktën nëntë dhe plagosur më shumë se 60, kanë njoftuar zyrtarët lokalë ukrainas.
Kryetari i bashkisë së qytetit, Vitali Klitschko, tha se zjarret u shkaktuan nga sulmet me dronë, ndërsa ka shqetësime se njerëzit mund të mbeten nën rrënoja.
Rusia sulmoi gjithashtu qytetin verilindor Kharkiv me dy të plagosur, tha kryebashkiaku lokal.
Sulmet brenda natës tregojnë se “Rusia, jo Ukraina, është pengesa për paqen”, tha ministri i Jashtëm ukrainas, Andrii Sybiha.
“Putini demonstron me veprimet e tij, jo me fjalë, se ai nuk respekton asnjë përpjekje për paqe dhe dëshiron vetëm të vazhdojë luftën”, shkroi ai në një postim në X.
“Dobësia dhe lëshimet nuk do ta ndalin terrorin dhe agresionin e tij. Vetëm forca dhe presioni do ta ndalin”.
Një deputet ukrainas i tha BBC-së se sulmet gjatë natës në Ukrainë ishin “me të vërtetë të tmerrshme” dhe se nuk duket se asnjë lloj paqeje është afër.
Duke folur për programin Today, Oleksiy Goncharenko nënvizon nevojën e Ukrainës për t’i dhënë fund luftës “sa më shpejt të jetë e mundur”.
Por ai deklaroi se Ukraina ka “vija të kuqe” – duke përfshirë se ato nuk do të njohin territoret e pushtuara si ruse – dhe garanci sigurie brenda çdo marrëveshjeje paqeje.
“Shpresoj se [Trump] do të kuptojë për të arritur këtë paqe që ju nevojitet për të ushtruar presion jo vetëm mbi Ukrainën, por edhe mbi Rusinë”, tha ai.
