Derisa SHBA po përpiqet të bëjë presion për arritjen e një marrëveshjeje paqeje, Rusia vetëm sa i ka rritur sulmet ndaj caqeve të ndryshme në Ukrainë.
Në një sulm të fundit me dronë në një hotel në Kryvyi Rih, kanë pësuar edhe vullnetarë amerikanë dhe britanikë nga një organizatë humanitare.
Zelensky tha se operacioni i shpëtimit në Kryvyi Rih “zgjati gjithë natën”.
“Raketat balistike goditën një hotel të zakonshëm. Pak para sulmit, vullnetarë nga një organizatë humanitare – qytetarë të Ukrainës, Shteteve të Bashkuara dhe Britanisë – u regjistruan në hotel”, njoftoi ai.
“Ata mbijetuan sepse arritën të zbrisnin nga dhomat e tyre. Por, për fat të keq, katër persona u vranë në sulm”.
“Në total u plagosën më shumë se 30 persona, të gjithëve iu ofrua ndihma e nevojshme. Nga goditja u dëmtuan shumë objekte civile përreth hotelit. Ekipet e shpëtimit janë ende duke punuar në vendin e ngjarjes – të gjitha shërbimet. Nuk mund të ketë pauzë në presionin ndaj Rusisë për të ndalur këtë luftë dhe terror kundër jetës”.
Mbi 190 milje larg, qyteti port jugor ukrainas i Odesa u “sulmua masivisht”, sipas guvernatorit të rajonit.
Oleh Kiper tha se dronët rusë synuan infrastrukturën civile dhe energjetike, duke plagosur dy persona dhe duke shkatërruar një shtëpi dykatëshe.
