Sekretari i Përgjithshëm i NATO-s vizitoi sot Kievin, ku u prit nga presidenti ukrainas Volodymyr Zelensky, vetëm disa ditë pas samitit të rëndësishëm të Aleancës në Uashington. Në fjalimin e tij, ai theksoi se tre vjet e gjysmë pas pushtimit të plotë rus, Ukraina vazhdon të qëndrojë e fortë, ndërsa mbështetja e NATO-s mbetet “e palëkundur dhe në rritje”.
Sekretari i NATO-s nënvizoi se përmes listës së re të prioriteteve për Ukrainën (PURL), Aleatët tashmë kanë siguruar mbi 1.5 miliardë dollarë ndihmë shtesë ushtarake në më pak se një muaj, duke përfshirë sisteme mbrojtjeje ajrore, municione dhe pajisje të tjera. “Paketa të reja do të pasojnë,” tha ai.
Ai vlerësoi gjithashtu kontributin e industrisë së mbrojtjes ukrainase, sidomos në fushën e dronëve, duke theksuar se Aleatët mund të mësojnë shumë nga Ukraina, ndërkohë që investimet perëndimore do të ndihmojnë jo vetëm sigurinë por edhe ekonominë e vendit.
Sekretari i Përgjithshëm përmendi bashkëpunimin e ngushtë përmes komandës së NATO-s në Gjermani (NSATU), qendrës së trajnimit në Poloni dhe zyrës së NATO-s në Kiev. “Jemi bashkë sepse ndajmë vlera të përbashkëta – lirinë, demokracinë dhe sundimin e ligjit,” tha ai.
Duke kujtuar viktimat dhe shkatërrimet nga bombardimet ruse, ai lavdëroi guximin e popullit dhe ushtrisë ukrainase që kanë mbajtur linjat e frontit.
Në vijim, ai iu referua takimit në Uashington me presidentin amerikan Donald Trump dhe liderë të tjerë evropianë, duke thënë se po punohet për garanci të forta sigurie për Ukrainën. “Presidenti Trump e ka bërë këtë prioritet – jo vetëm për të thyer bllokadën me Putinin, por edhe për të garantuar se SHBA do të përfshihet në sigurimin e të ardhmes së Ukrainës,” theksoi ai.
Sipas tij, garancitë e reja duhet të jenë të qarta dhe të zbatueshme, në mënyrë që Rusia të mos guxojë më kurrë të marrë asnjë kilometër katror të territorit ukrainas.
Në fund të fjalimit, Sekretari i NATO-s i shprehu respekt Zelenskyt dhe popullit të tij, duke e siguruar se Aleanca do të qëndrojë pranë Ukrainës ndërsa vendi përgatitet të festojë Ditën e Pavarësisë.
“Slava Ukraini,” përfundoi ai.
