Dogana e Kosovës ka njoftuar se në Prishtinë janë zbuluar 500 mijë euro mallra të dyshuara për kontrabandë.
Në njoftimin e Doganës, shtohet se, depoja ku është gjetur malli, s’ka qenë e regjistruar si biznes dhe se, e njëjta s’ka poseduar asnjë dokumentacion që ka dëshmuar prejardhjen e mallit.
“Vlera e përafërt e mallit të dyshuar vlerësohet të jetë mbi 500,000.00 euro”, ka njoftuar Dogana mes tjerash.
Njoftimi i plotë:
Zbulohen mbi 500 mijë euro mallra të dyshuara për kontrabandë
Sot, më 27 shkurt 2026, në periferi të Prishtinës, bazuar në informata të siguruara përmes rrugëve operative, zyrtarët e Doganës së Kosovës kanë realizuar një kontroll në një depo ku dyshohej për mallra të kontrabanduara.
Kontrolli është organizuar në përputhje me autorizimet që rrjedhin nga Kodi Doganor i Republikës së Kosovës. Gjatë veprimeve në terren është konstatuar një sasi e konsiderueshme mbathjesh me marka të mbrojtura tregtare.
Depoja në fjalë nuk ishte e regjistruar si biznes dhe nuk posedonte asnjë dokumentacion që dëshmonte prejardhjen e mallit.
Lidhur me rastin është njoftuar Prokuroria Themelore në Prishtinë, e cila ka udhëzuar zyrtarët doganorë për ndërmarrjen e veprimeve të mëtejshme hetimore.
Aktualisht, malli është duke u sekuestruar dhe inventarizuar. Vlera e përafërt e mallit të dyshuar vlerësohet të jetë mbi 500,000.00 euro.
Doganat e Kosovës mbeten të përkushtuara në luftimin e kontrabandës dhe mbrojtjen e ekonomisë formale, konkurrencës së ndershme dhe të drejtave të pronësisë intelektuale.
