Shtetet e Bashkuara do të nisin diskutimet me aleatët evropianë për zvogëlimin e trupave amerikane në Evropë më vonë këtë vit, deklaroi të premten ambasadori amerikan në NATO, Matthew Whitaker, shkruan Reuters, përcjellë Storm.
“Asgjë nuk është vendosur ende. Por sapo të ndodhë, do t’i zhvillojmë këto bisedime brenda strukturës së NATO-s. Këto diskutime do të nisin pas samitit të NATO-s, diku më vonë gjatë vitit… Të gjithë aleatët tanë janë të gatshëm për këtë”, tha Whitaker i pyetur lidhur me një raport se administrata Trump po shqyrton tërheqjen e trupave nga Evropa.
Gjatë një konference sigurie në Estoni, Whitaker theksoi se SHBA do të diskutojë çdo ndryshim të trupave me aleatët për të shmangur boshllëqet e sigurisë.
“Është më shumë se 30 vjet dëshirë e SHBA-së për të reduktuar trupat në Evropë. Presidenti Trump thjesht tha: Mjaft më – kjo do të ndodhë tani dhe në mënyrë të rregullt. Por nuk kemi më durim për zvarritje. Duhet vetëm të përballojmë pasojat praktike”, tha Whitaker.
Sekretari amerikan i Mbrojtjes, Pete Hegseth, u tha aleatëve të NATO-s në shkurt se “realitetet e forta strategjike pengojnë SHBA-në që të fokusohet kryesisht në sigurinë e Evropës”.
Sipas një raporti të The Atlantic në mars, Hegseth dhe nënpresidenti JD Vance kishin shprehur pakënaqësi në një grup diskutimi për aleatët evropianë. Hegseth thuhet se ka shprehur “urrejtje ndaj parazitizmit evropian”.
Këto komente kanë shtuar frikën në Evropë mbi angazhimin e SHBA-së ndaj NATO-s, së bashku me kërcënimet e Trump për të mos mbrojtur vendet që shpenzojnë pak për mbrojtjen dhe hezitimin e tij për të vazhduar mbështetjen ndaj Ukrainës kundër pushtimit rus.
Megjithatë, Whitaker theksoi se SHBA nuk po largohet nga aleanca.
“Shtetet e Bashkuara do të qëndrojnë në këtë aleancë dhe do të jenë një mik dhe aleat i madh”.
Ai gjithashtu paralajmëroi Bashkimin Evropian që të mos kufizojë blerjet e mbrojtjes vetëm për kompanitë e BE-së, duke thënë se veprime të tilla mund të minojnë ndërveprueshmërinë e NATO-s, të ngadalësojnë riarmatimin e Evropës, të rrisin kostot dhe të pengojnë inovacionin.
