Administrata Trump ka zhvilluar bisedime të fshehta me Hamasin për lirimin e robërve amerikanë të mbajtur në Gaza, raportojnë mediat ndërkombëtare, përcjellë Storm.
Sipas burimeve të lidhura me ngjarjen, i dërguari i posaçëm i SHBA për çështjet e pengjeve, Adam Boehler ka mbajtur bisedime të drejtpërdrejta me Hamasin javët e fundit në Doha.
Ndërsa fokusi i bisedimeve ka qenë në lirimin e robërve të SHBA-së, ato kanë përfshirë gjithashtu diskutime për lirimin e të gjithë robërve të mbetur gjithashtu, thanë burimet e gazetës.
Konsulli i Përgjithshëm izraelit në Nju Jork, Ofir Akunis, iu përgjigj raportit të bisedimeve të drejtpërdrejta duke thënë: “Ata mund të flasin me Hamasin, kjo është në rregull”.
Në një intervistë për Fox Business, Akunis tha: “Nëse Shtëpia e Bardhë dëshiron të flasë drejtpërdrejt me Hamasin dhe t’i vërë ata nën presion për të liruar më shumë pengje, do të ishim të lumtur të shohim më shumë pengje me familjet e tyre”.
Deri kohët e fundit, SHBA-të i kishin shmangur diskutimet e drejtpërdrejta me Hamasin, me Departamentin e Shtetit të SHBA-së që e kishte caktuar grupin si një organizatë “terroriste e huaj” në 1997.
Ndërkohë, sekretarja e shtypit e Shtëpisë së Bardhë, Karoline Leavitt, ka konfirmuar se administrata Trump ka qenë e angazhuar në bisedime me Hamasin.
Duke folur në një konferencë për shtyp, Leavitt tha se “i dërguari i posaçëm që është i angazhuar në ato negociata ka autoritetin të flasë me këdo”.
Leavitt shtoi se Izraeli u konsultua për këtë çështje dhe se presidenti Trump beson në “dialog dhe bisedë me njerëzit në mbarë botën për të bërë atë që është në interesin më të mirë të popullit amerikan”.
“Këto janë bisedime dhe diskutime të vazhdueshme, nuk do t’i detajoj këtu, ka jetë amerikane në rrezik”.
