Pavarësisht paralajmërimit nga presidenti i ardhshëm i SHBA-së, Vladimir Putin ka vazhduar të përshkallëzojë sulmet ndaj Ukrainës.
Putin përqesh Trumpin?
storm•/SHBA-Rusi: Ushtria ruse sulmoi territorin ukrainas me raketa, bomba ajrore dhe më shumë se 100 dronë vetëvrasës në orët e para të fillimit të kësaj jave. Përshkallëzimi i tensioneve ndodh pavarësisht një telefonate në Kremlin për të mos përshkallëzuar konfliktin, thuhet se e bërë nga presidenti i zgjedhur amerikan Donald Trump.
Sipas The Washington Post, z. Trump i bëri thirrje presidentit rus, Vladimir Putin, që të mos e përshkallëzojë luftën në Ukrainë, duke kujtuar se trupat amerikane janë të stacionuara në Evropë.
Por sipas ekspertëve, përkundrazi, Putin po intensifikon bombardimet e tij dhe Rusia mund të nisë një sulm të ri të madh mbi infrastrukturën e energjisë elektrike të Ukrainës para sezonit të dimrit për të penguar përpjekjet e Kievit për të rikthyer kapacitetet e prodhimit të humbura gjatë bombardimeve ruse që nga marsi.
Ky supozim buron nga fakti se Rusia ka nisur sulme në territorin ukrainas pothuajse ekskluzivisht duke përdorur dronë për javë të tëra.
