Analisti politik, Azem Vllasi, tha se Kosova po kalon një krizë të thellë politike dhe se në këtë situatë, formimi i një qeverie, çfarëdo qoftë ajo, do të ishte zgjidhja më e pranueshme sesa mbajtja e zgjedhjeve të reja.
“Pasi që së bashku e kanë zhytur Kosovën në një krizë të thellë, për momentin, e keqja më e vogël do të ishte formimi i çfarëdo qeverie, sesa shkuarja në zgjedhje të reja tani”, ka deklaruar Vllasi për FrontOnline.
Ai ka theksuar se vendi nuk mund të lejojë shtyrje të vendimeve të rëndësishme që presin zbatim.
“Duhet të merren disa vendime që nuk presin shtyrje, e më pas të shihet se çfarë do të ndodhë më tutje”, ka shtuar analisti.
Albin Kurti, kryeministër në detyrë dhe mandatar për të formuar Qeverinë e re, nuk i ka siguruar 61 votat e nevojshme për të nisur një mandat të ri në pushtet.
Presidentja Vjosa Osmani ka pritur të premten në takim liderët e partive politike për të diskutuar për gjetjen e ndonjë zgjidhje.
Liderët e partive politike kanë deklaruar se nuk kanë shumicë parlamentare dhe se rruga më e duhur është shkuarja në zgjedhje.
