Mitrovicë e Jugut, 13 Tetor 2025 – Vetëm 28 vota ndajnë dy kandidatët kryesorë në një nga garat më të tensionuara të zgjedhjeve lokale: Arian Tahiri i PDK-së dhe Faton Peci i Lëvizjes Vetëvendosje. Sipas rezultateve paraprake të Komisionit Qendror të Zgjedhjeve, Tahiri kryeson lehtësisht me 47.89%, përballë 47.80% të Pecit.
Në një qytet ku pjesëmarrja ishte vetëm 37.89%, fitorja nuk i buzëqeshi asnjërit prej kandidatëve në raundin e parë. 700 vota më shumë do të kishin mjaftuar që PDK të ruante bastionin e saj në veri, por mbështetja e fragmentuar dhe votat e shpërndara e kanë çuar garën drejt një epilogu të madh.
Fati në duart e votave të veçanta – por balotazhi duket i pashmangshëm
Aktualisht, të gjitha kutitë janë numëruar (105/105), por rezultatet mbeten jo përfundimtare, pasi pritet ende numërimi i votave me kusht, votave për personat me nevoja të veçanta, si dhe votave përmes postës.
Megjithatë, meqenëse asnjëri prej kandidatëve nuk e ka kaluar pragun prej 50% të votave, gjithçka po shkon drejt një balotazhi vendimtar, i caktuar për 9 Nëntor 2025.
Përballje e madhe: Qeveria qendrore përballë modelit të ri të PDK-së
Nëse konfirmohet balotazhi, Mitrovica e Jugut do të jetë skena e një përballjeje titanike. Në njërën anë, qëndron Faton Peci, i mbështetur fuqishëm nga koalicioni në pushtet – LVV, Guxo dhe Alternativa – dhe nga qeveria qendrore në detyrë. Në anën tjetër, qëndron Arian Tahiri, një figurë e re politike, që përfaqëson brez të ri të PDK-së, dhe që kërkon të vazhdojë trashëgiminë e Bedri Hamzës, kryetarit aktual të komunës.
Ky duel i 9 Nëntorit shihet si test jo vetëm për të ardhmen e Mitrovicës së Jugut, por edhe për ndikimin politik të qeverisë në zgjedhjet lokale dhe për fuqinë organizative të një PDK-je që përballet me sfida të mëdha për të ruajtur bastionet tradicionale.
