Një gjykatë federale e apelit në SHBA, vendosi të premten se Presidenti Donald Trump nuk kishte të drejtë ligjore për të vendosur tarifa gjithëpërfshirëse, dhe se Trump tejkaloi autoritetin e tij sipas një ligji për fuqitë emergjente.
Megjithatë, vendimi i Gjykatës së Apelit të SHBA-së për Qarkun Federal i la ato në fuqi për momentin deri në mesin e tetorit, duke i dhënë administratës së Trump kohë për të apeluar në Gjykatën Supreme.
“Nëse lejohet të qëndrojë në fuqi, ky vendim do të shkatërronte fjalë për fjalë Shtetet e Bashkuara të Amerikës”, reagoi Trump në platformën e tij të mediave sociale.
Vendimi i së premtes shihet si një goditje e madhe ligjore që mbështeti kryesisht një vendim të majit nga një gjykatë federale e specializuar tregtare në Nju Jork.
Vendimi gjithashtu ndërlikon ambiciet e Trump për të përmbysur plotësisht dekada të politikës tregtare amerikane me forcat e tij.
Tarifat e Trump – dhe mënyra e çrregullt se si i ka zbatuar ato – kanë tronditur tregjet globale, kanë armiqësuar partnerët dhe aleatët tregtarë të SHBA-së dhe kanë rritur frikën për çmime më të larta dhe rritje më të ngadaltë ekonomike.
Vendimi i gjykatës përqendrohet në tarifat që Trump vendosi në prill mbi pothuajse të gjithë partnerët tregtarë të SHBA-së dhe tarifat që ai vendosi më parë mbi Kinën, Meksikën dhe Kanadanë.
Në atë që ai e quajti Dita e Çlirimit, Trump më 2 prill vendosi të ashtuquajturat tarifa reciproke deri në 50% për vendet me të cilat Shtetet e Bashkuara kanë një deficit tregtar dhe tarifa bazë prej 10% për pothuajse të gjithë të tjerët.
Udhëheqësi amerikan më vonë pezulloi tarifat reciproke për 90 ditë për t’u dhënë vendeve kohë për të negociuar marrëveshje tregtare me Shtetet e Bashkuara – dhe për të zvogëluar barrierat e tyre ndaj eksporteve amerikane.
Disa prej tyre e bënë këtë – përfshirë Mbretërinë e Bashkuar, Japoninë dhe Bashkimin Evropian – dhe ranë dakord për marrëveshje të pabarabarta me Trump për të shmangur tarifa edhe më të mëdha.
Duke pretenduar fuqi të jashtëzakonshme për të vepruar pa miratimin e Kongresit, Trump i justifikoi taksat sipas Aktit Ndërkombëtar të Fuqive Ekonomike të Emergjencës të vitit 1977 duke shpallur deficitet tregtare të gjata të Shteteve të Bashkuara “një emergjencë kombëtare”.
