Deputetja e Aleancës për Ardhmërinë e Kosovës (AAK), Time Kadrijaj, ka kritikuar ashpër qeverinë pasi propozimi i opozitës për futjen e draft-rezolutës për mbrojtjen e së vërtetës historike si pikë e parë e rendit të ditës, nuk u miratua.
Sipas raportimit të Ekonomia Online, Kadrijaj pyeti mazhorancën se cila është arsyeja që po e zvarritin votimin e një dokumenti që synon mbrojtjen e vlerave të luftës së Ushtrisë Çlirimtare të Kosovës (UÇK).
„Muaji mars është muaji i epopeve të rëndësishme në luftën e UÇK-së: Epopeja e Jasharëve, Epopeja e Dukagjinit, si dhe përvjetorët e masakrave të tmerrshme. Dje, kryeministri Kurti ishte në Krushë, para disa ditësh nderuam viktimat në Beleg, ku ende ka të pagjetur. A kemi të drejtë ne si shtet t’i fyejmë këto viktima? Nuk kemi të drejtë. Po bëjmë padrejtësi“, deklaroi ajo.
Thirrja për Andin Hotin dhe kritikat për librin e Shkëlzen Gashit Gjatë fjalës së saj, Kadrijaj pati edhe një kërkesë specifike për Andin Hotin (Kryetar i Komisionit Qeveritar për Persona të Zhdukur), duke i bërë thirrje që të iniciohet amendimi i Ligjit për Mbrojtjen e Vlerave të Luftës.
“Unë po i lutem ministrit: amendoni ligjin. Ti Andin, si djali i Ukshin Hotit – njeriut që ende nuk i dihet varri, ashtu si edhe shumë viktimave të tjera – e di peshën e kësaj historie. Historia e qytetarëve të Kosovës nuk mund të ndryshohet me ligjërime e as me organizime të tilla”, shtoi deputetja.
Më tej, ajo kërkoi tërheqjen e menjëhershme të librit për masakrat në Kosovë të autorit Shkëlzen Gashi, i cili sipas saj përmban të pavërteta dhe është financuar nga Ministria e Punëve të Jashtme.
“Është turp që vetë shteti i Kosovës ka shpërndarë libra me të pavërteta nëpër Evropë. Tërhiqeni atë libër dhe ashpërsoni sa më shpejt ligjin për mbrojtjen e luftës”, përfundoi Kadrijaj.
