Ish-kryeministri britanik Tony Blair do të marrë pjesë në një takim në Uashington, të kryesuar nga Presidenti i SHBA-së Donald Trump, për të diskutuar planet për Gazën e pasluftës, ka konfirmuar BBC.
Uebsajti Axios raporton se dhëndri i Trump dhe ish-këshilltari i lartë, Jared Kushner, do të jetë gjithashtu i pranishëm në takim, i cili do të përfshijë diskutime mbi rritjen e ndihmës për territorin palestinez.
I dërguari i SHBA-së për Lindjen e Mesme, Steve Witkoff, ka thënë se SHBA-të po hartojnë një plan “shumë gjithëpërfshirës” për “të nesërmen” pas konfliktit.
Takimi vjen pasi ushtria izraelite i paralajmëroi palestinezët se evakuimi i qytetit të Gazës ishte “i pashmangshëm”, ndërsa forcat e saj përgatiten ta pushtojnë atë.
Tanket izraelite hynë në një zonë të re të qytetit gjatë natës, duke shkatërruar shtëpi dhe duke detyruar më shumë banorë të largoheshin, thanë dëshmitarët.
Mijëra njerëz janë zhvendosur tashmë për shkak të përparimeve të fundit izraelite – kryesisht në pjesë të tjera të qytetit, ku ende jetojnë rreth një milion palestinezë.
Në fillim të gushtit, Izraeli njoftoi planet për të pushtuar të gjithë Rripin e Gazës – përfshirë Qytetin e Gazës, të cilin e përshkroi si bastionin e fundit të Hamasit.
OKB-ja dhe organizatat joqeveritare kanë paralajmëruar se një ofensivë izraelite në qytetin e Gazës – ku javën e kaluar u shpall zi buke – do të kishte një “ndikim të tmerrshëm humanitar”.
Në një intervistë me Fox News të martën, Steve Witkoff tha se besonte se lufta në Gaza mund të përfundonte brenda katër muajve të ardhshëm.
“Do ta zgjidhim këtë në një mënyrë ose në një tjetër, sigurisht para fundit të këtij viti”, deklaroi ai.
I pyetur në lidhje me një plan për qeverisjen e Gazës pas luftës, ai tha se do të ketë një “takim të madh në Shtëpinë e Bardhë” të mërkurën, të kryesuar nga presidenti, për të diskutuar atë plan.
“Është një plan shumë gjithëpërfshirës që po e hartojmë të nesërmen, të cilin mendoj se shumë njerëz do ta shohin… sa i fuqishëm është dhe sa mirëkuptimplotë është, dhe pasqyron motivet humanitare të Presidentit Trump këtu”, shtoi ai.
