Presidenti i Shteteve të Bashkuara, Donald Trump, ka ngritur një padi për shpifje kundër gazetës The Wall Street Journal dhe pronarëve të saj, përfshirë manjatin e medias Rupert Murdoch, duke kërkuar të paktën 10 miliardë dollarë dëmshpërblim për publikimin e një raporti tronditës mbi miqësinë e presidentit me shkelësin famëkeq të krimeve seksuale, Jeffrey Epstein.
Trump ngriti padinë në gjykatën federale në Distriktin Jugor të Floridës të premten, ndërsa përpiqet të parandalojë përhapjen e mëtejshme të një skandali në rritje rreth çështjes Epstein dhe kërcënimin për t’i shkaktuar dëme serioze politike.
Trump gjithashtu udhëzoi Departamentin e Drejtësisë të paraqesë një mocion në gjykatën federale të Manhattanit për të zbuluar transkriptet e jurisë së madhe në çështjen Epstein dhe atë të ish-bashkëpunëtores së tij, Ghislaine Maxwell, e cila në vitin 2021 u dënua për pesë akuza federale që lidheshin me rolin e saj në abuzimin seksual të vajzave të mitura nga Epstein.
Në padinë për shpifje, Trump akuzon Dow Jones, News Corp, Murdoch dhe dy gazetarë të Wall Street Journal se kanë vepruar me qëllim keqdashës që i kanë shkaktuar dëme të mëdha financiare dhe reputacionale. Dow Jones, kompania mëmë e gazetës, është një degë e News Corp.
Përpara se të ngrinte padinë, Trump shkroi të premten në mëngjes në platformën e tij të mediave sociale Truth Social.
“Pres me padurim që Rupert Murdoch të dëshmojë në padinë time kundër tij dhe gazetës së tij ‘grumbulli i mbeturinave’, WSJ. Kjo do të jetë një përvojë interesante!!!”
Në përgjigje, pronari i Wall Street Journal, Dow Jones, tha se do të “mbrohet me forcë” kundër veprimeve ligjore të Trump.
“Ne kemi besim të plotë në rigorozitetin dhe saktësinë e raportimit tonë dhe do të mbrohemi me forcë kundër çdo padie”, tha një zëdhënës i Dow Jones.
