Presidenti amerikan Donald Trump ka njoftuar në orët e hershme të mëngjesit se është arritur armëpushimi mes Izraelit dhe Iranit.
“Armëpushimi tani është në fuqi. Ju lutem mos e shkelni atë!”, ka thënë në një postim në Truth Social.
Kërkesa për armëpushim është pranuar nga Izraeli, i cili tha se tash ka ‘eliminuar kërcënimin bërthamor dhe raketor të Iranit’
Sipas deklaratës, Izraeli ka hequr “kërcënimin e dyfishtë ekzistencial të menjëhershëm” të Iranit nga armët bërthamore dhe raketat balistike.
Gjithashtu thuhet se Izraeli ka “shkaktuar dëme të rënda ndaj udhëheqjes ushtarake dhe ka shkatërruar dhjetëra objektiva qendrore të qeverisë iraniane”.
Deklarata vazhdon duke thënë se forcat izraelite, në ditën e fundit, kanë “goditur rëndë objektiva qeveritare në zemër të Teheranit, duke eliminuar qindra operativë të Basij” – një milici që qeveria iraniane shpesh e përdor për të shtypur protestat – dhe “duke eliminuar një tjetër shkencëtar të lartë bërthamor”.
“Izraeli falënderon Presidentin Trump dhe Shtetet e Bashkuara për mbështetjen e tyre në mbrojtje dhe pjesëmarrjen e tyre në eliminimin e kërcënimit bërthamor iranian”, shtohet në deklaratë.
