Presidenti amerikan Donald Trump dhe presidenti ukrainas Volodymyr Zelensky pritet të takohen në Davos për të finalizuar një marrëveshje të madhe ekonomike që synon të mobilizojë rreth 800 miliardë dollarë për rindërtimin e Ukrainës në një periudhë 10-vjeçare, sipas raportimeve të mediave perëndimore.
Raportohet se Zelensky kishte planifikuar fillimisht një vizitë në Uashington për të mbyllur njëkohësisht edhe paketën e sigurisë, por këshillat evropiane e shtynë drejt një qasjeje “me dy hapa”: fillimisht marrëveshja ekonomike, pastaj garancitë e sigurisë dhe paketa e paqes.
Ndërkohë, mbetet e paqartë nëse në Davos do të hapet edhe kapitulli i propozimit të paqes, pasi negociatat vazhdojnë të bllokohen në çështje kyçe si Donbasi dhe format e garancive ndërkombëtare. Në prapaskenë, diskutohen edhe modele të mbështetjes evropiane pas luftës, përfshirë ide për prani shumëkombëshe të udhëhequr nga Britania dhe Franca — por gjithçka varet nga marrëveshja politike dhe reagimi i Rusisë.
