Presidenti i Shteteve të Bashkuara, Donald Trump, do të presë udhëheqësin e përkohshëm të Sirisë për bisedime këtë muaj, në atë që do të shënoj vizitën e parë të një presidenti sirian në kryeqytetin e SHBA-së.
Ministri i Jashtëm sirian, Asaad al-Shaibani, tha në një fjalim të dielën se vizita do të ndihmojë në hapjen e një “kapitulli të ri” në marrëdhëniet midis Damaskut dhe Uashingtonit.
“Presidenti Ahmed al-Sharaa do të jetë në Shtëpinë e Bardhë në fillim të nëntorit. Sigurisht, kjo është një vizitë historike. Është vizita e parë e një presidenti sirian në Shtëpinë e Bardhë në më shumë se 80 vjet. Do të ketë shumë çështje në tryezë, duke filluar me heqjen e sanksioneve dhe hapjen e një kapitulli të ri midis Shteteve të Bashkuara dhe Sirisë. Ne duam të krijojmë një partneritet shumë të fortë midis dy vendeve”.
Më herët, faqja e internetit amerikane e lajmeve Axios citoi Tom Barrack, të dërguarin e SHBA-së në Siri, të ketë thënë se al-Sharaa pritet të nënshkruajë një marrëveshje për t’u bashkuar me një aleancë ndërkombëtare të udhëhequr nga SHBA-të kundër grupit ISIS.
Al-Sharaa, i cili mori pushtetin nga Bashar al-Assad në dhjetor, është përpjekur të rivendosë lidhjet e Sirisë me fuqitë botërore që e kishin shmangur Damaskun gjatë sundimit të al-Assad.
Ai u takua me Trump në Arabinë Saudite në maj, në atë që ishte takimi i parë midis udhëheqësve të dy vendeve në 25 vjet.
Takimi ndodhi në margjinat e takimeve të Trump me udhëheqësit e Këshillit të Bashkëpunimit të Gjirit, që u pa si një kthesë e madhe ngjarjesh për një Siri që ende po përshtatet me jetën pas sundimit më shumë se 50-vjeçar të familjes al-Assad.
Al-Sharaa gjithashtu iu drejtua Asamblesë së Përgjithshme të Kombeve të Bashkuara në Nju Jork në shtator.
Ai dikur drejtonte degën siriane të al-Kaedës. Një dekadë më parë, grupi i tij anti-Assad u shkëput nga rrjeti dhe më vonë u përlesh me ISIS-in. Al-Sharaa gjithashtu dikur kishte një shpërblim amerikan prej 10 milionë dollarësh për kokën e tij.
Presidenti i Sirisë ishte bashkuar me luftëtarët që luftonin kundër forcave amerikane në Irak përpara se të hynte në luftën siriane. Ai madje u burgos nga forcat amerikane atje për disa vite.
Koalicioni i udhëhequr nga SHBA-të dhe partnerët e saj vendas e dëbuan ISIS-in nga bastioni i tij i fundit në Siri në vitin 2019.
Vizita e planifikuar e Al-Sharaa në Uashington, DC, vjen ndërsa Trump po u bën thirrje aleatëve të Lindjes së Mesme të shfrytëzojnë momentin për të ndërtuar një paqe të qëndrueshme në rajonin e paqëndrueshëm, pasi Izraeli dhe Hamasi muajin e kaluar filluan zbatimin e një armëpushimi dhe shkëmbimi të robërve. Kjo marrëveshje synon t’i japë fund përgjithmonë luftës dyvjeçare të Izraelit në Gaza.
Armëpushimi i brishtë vazhdon të zbatohet, por situata mbetet e pasigurt.
Siria dhe Izraeli janë në bisedime për të arritur një marrëveshje që Damasku shpreson se do të sigurojë ndalimin e sulmeve ajrore izraelite në territorin e saj dhe tërheqjen e trupave izraelite që kanë hyrë në Sirinë jugore.
