Presidenti i SHBA-së Donald Trump e shfrytëzoi skenën e Davos-it për ta formalizuar “Board of Peace” — një strukturë që administrata e tij e paraqet si instrument të ri ndërkombëtar për zgjidhjen e konflikteve dhe ndërmjetësimin e krizave, me pretendime që e vendosin atë në konkurrencë politike me arkitekturën klasike të OKB-së.
Në ceremoninë e nënshkrimit, Trump u shoqërua nga 19 liderë, por prania europiane ishte minimale: vetëm dy përfaqësues nga vende anëtare të BE-së, Hungaria dhe Bullgaria. Ky kontrast u lexua si tregues i dyfishtë — ambicie e madhe nga Uashingtoni, por edhe kufij të qartë të pranimit nga aleatët tradicionalë europianë.
Sipas Reuters, Trump ka këmbëngulur se “Bordi” nuk synon ta zëvendësojë OKB-në, por ta plotësojë atë; megjithatë, skepticizmi është ushqyer edhe nga vendime të fundit të administratës së tij, përfshirë tërheqjen e SHBA-së nga 66 organizata ndërkombëtare, shumë prej tyre të ndërlidhura me mekanizmat e OKB-së.
Reagimet ndërkombëtare kanë qenë të përziera. Disa shtete kanë dhënë sinjale të shpejta gatishmërie për t’u përfshirë, ndërsa të tjera kanë zgjedhur formulën “po e shqyrtojmë” — përfshirë Rusinë dhe Kinën. Një pjesë e vendeve europiane kanë refuzuar hapur, si Norvegjia dhe Sllovenia (të paktën në formatin aktual), duke e problematizuar mandatin e zgjeruar dhe modelin e qeverisjes së nismës.
Një nga pikat më të debatueshme është dimensioni financiar dhe statusi i anëtarësimit: raportime të mediave amerikane citojnë zyrtarë amerikanë se një “ulëse e përhershme” lidhet me një shifër prej 1 miliard dollarësh, por me pretendimin se kontributi nuk është tarifë hyrëse dhe mbetet vullnetar.
Në prapavijë është edhe Gaza. “Board of Peace” ka një bazë të lidhur me mandatin e OKB-së (Rezoluta 2803/2025) për një administrim tranzitor në Gaza, por karta e publikuar së fundmi është më e gjerë dhe nuk e përmend specifikisht Gazën, çka ka rritur shqetësimin se nisma mund të shtrihet në kriza të tjera globale sipas vizionit të Trumpit.
Një episod tjetër që e ka tensionuar situatën ka qenë përplasja me Kanadanë: pas fjalimit të fortë të kryeministrit Mark Carney në Davos për “fundin e rendit të bazuar në rregulla”, Trump reagoi publikisht dhe raportimet thonë se ia hoqi Kanadasë ftesën për “Bordin”.
Në këtë mënyrë, “Board of Peace” po del jo vetëm si projekt diplomatik, por si test i ri politik: sa vende janë të gatshme ta ndjekin Uashingtonin në një format të ri ndërkombëtar — dhe sa do të preferojnë të qëndrojnë brenda kornizave të OKB-së dhe aleancave ekzistuese.
