Presidenti i SHBA-së, Donald Trump, po shqyrton mundësinë e dërgimit të raketave lundruese me rreze të gjatë veprimi ‘Tomahawk’ në Ukrainë, duke thënë se kjo do të përbënte “një hap të ri agresioni” në luftën e saj me Rusinë.
Kur u pyet në Air Force One nëse do të dërgonte raketa Tomahawk në Ukrainë, Trump u përgjigj “do ta shohim… Mund ta bëj”.
Deklarata vjen pas një telefonate të dytë në fundjavë midis Trump dhe presidentit ukrainas Volodymyr Zelensky, të cilët raportohet se diskutuan për rritjen e aftësive ushtarake për të nisur kundërsulme kundër Rusisë.
Moska e ka paralajmëruar më parë Uashingtonin kundër furnizimit të Kievit me raketa me rreze të gjatë veprimi, duke thënë se kjo do të shkaktonte një përshkallëzim të madh të konfliktit dhe do të tendoste marrëdhëniet SHBA-Rusi.
Raketat Tomahawk kanë një rreze veprimi prej 2,500 km (1,500 milje), gjë që do ta vinte Moskën brenda mundësive të Ukrainës.
Gjatë diskutimit me gazetarët derisa ishte rrugës për në Izrael, Trump la të hapur mundësinë që të fliste me Rusinë në lidhje me raketat Tomahawk të kërkuara nga Ukraina.
“Mund t’u them atyre [Rusisë] se nëse lufta nuk zgjidhet, mund të zgjidhet, mund të mos zgjidhet, por mund ta bëjmë”.
“A duan ata [Rusia] që raketat Tomahawk të shkojnë në drejtimin e tyre? Nuk mendoj kështu”, tha presidenti Trump.
Kievi ka bërë kërkesa të shumta për raketa me rreze të gjatë veprimi, ndërsa po përgatitet të godasë qytete ruse larg vijave të frontit të konfliktit të ashpër.
Qytetet ukrainase, përfshirë Kievin, janë bombarduar vazhdimisht nga Rusia me dronë dhe raketa. Rusia ka synuar veçanërisht infrastrukturën energjetike të Ukrainës, duke shkaktuar ndërprerje të energjisë elektrike.
Muajin e kaluar, i dërguari special i Trump në Ukrainë, Keith Kellogg, sugjeroi që presidenti amerikan kishte autorizuar sulme të thella në territorin rus, duke i thënë Fox News se “nuk ka gjëra të tilla si strehë” nga sulmet në luftën Rusi-Ukrainë.
Rusia, e cila nisi pushtimin e saj në shkallë të plotë të Ukrainës në shkurt të vitit 2022, minimizoi shanset që raketat Tomahawk të ndryshonin rrjedhën e luftës.
Zëdhënësi i Kremlinit, Dmitry Peskov, tha muajin e kaluar: “Qofshin Tomahawks apo raketa të tjera, ato nuk do të jenë në gjendje ta ndryshojnë dinamikën.”
