Shtëpia e Bardhë postoi një foto të gjeneruar nga inteligjenca artificiale të Presidentit Donald Trump të paraqitur si Papë, disa ditë pasi ai bëri shaka se “do të donte të ishte Papë”.
Imazhi — i cili u shfaq për herë të parë në llogarinë e Trump në Truth Social — vjen ndërsa kardinalët janë gati të fillojnë konklavin më 7 maj për të zgjedhur Papën e ardhshëm.
Trump mori pjesë në funeralin e Papa Françeskut në Romë fundjavën e kaluar, gjatë të cilit ai u takua edhe me Presidentin ukrainas Volodymyr Zelenskyy.
Të martën, disa ditë pasi u kthye nga funerali i Françeskut, Trump bëri shaka me gazetarët jashtë Shtëpisë së Bardhë duke u thënë se do të “dëshironte të bëhej Papë”, derisa shtoi, “kjo do të ishte zgjedhja ime numër një”.
Ai vazhdoi duke thënë se nuk ka “asnjë preferencë” se kush zgjidhet në fund të fundit.
Zëvendëspresidenti JD Vance, i cili u konvertua në katolicizëm në vitin 2019, u takua me Papën Katolik Romak një ditë para vdekjes së tij.
Françesku vdiq nga një goditje në tru që përfundimisht çoi në dështim të pakthyeshëm të zemrës, thuhet në certifikatën e vdekjes të lëshuar nga Vatikani.
Postimi i imazhit të gjeneruar nga inteligjenca artificiale shkaktoi reagime të gjera në mediat sociale, me disa përdorues që e mbrojtën atë si shaka dhe të tjerë që e denoncuan fuqishëm imazhin.
Konferenca Katolike e Shtetit të Nju Jorkut, e cila përfaqëson peshkopët e shtetit, e dënoi ashpër postimin, duke thënë se “nuk ka asgjë të zgjuar apo qesharake në lidhje me këtë imazh”.
“Sapo varrosëm Papa Françeskun tonë të dashur dhe kardinalët janë gati të hyjnë në një konklavë solemne për të zgjedhur një pasardhës të ri të Shën Pjetrit”.
“Mos na tallni”, vazhdonte postimi.
Ish-kryetari i Komitetit Kombëtar Republikan, Michael Steele, një kritik i hapur i Trump, e kritikoi postimin dhe tha se ai [Trump] “konfirmon sa joserioz dhe i paaftë është”.
Kjo nuk është hera e parë që Shtëpia e Bardhë ndau një imazh të diskutueshëm të Trump, të gjeneruar nga inteligjenca artificiale.
Në shkurt, Zëvendës Shefi i Stafit të Shtëpisë së Bardhë, Taylor Budowich, postoi një imazh të gjeneruar nga inteligjenca artificiale të Trumpit të paraqitur si mbret, pasi administrata ndërmori veprime për të eliminuar programin e çmimeve të trafikut të Qytetit të Nju Jorkut.
Trump e quajti veten mbret në një postim në Truth Social, ku lavdëronte se “çmimi i trafikut ka vdekur”.
“Manhattani dhe i gjithë Nju Jorku janë shpëtuar. Rroftë mbreti”, shkroi Trump në Truth Social në shkurt.
