Presidenti Donald Trump ka sulmuar ashpër Kryeministrin britanik Keir Starmer dhe liderët evropianë si “zhgënjyes”, pasi Britania e Madhe dhe Franca refuzuan të dërgojnë anije luftarake për të hapur Ngushticën e Hormuzit të bllokuar nga Irani.
Në një konferencë dramatike nga Zyra Ovale, Presidenti Donald Trump nuk i ka kursyer ofendimet për aleatin e tij më të afërt, Keir Starmer. Duke treguar skulpturën e Winston Churchillit pas krahëve të tij, Trump deklaroi se Starmer “nuk është Churchill” dhe se politikat e tij për energjinë e erës “vrasin zogjtë”. Tensioni u rrit pasi Britania e Madhe, Franca dhe Gjermania refuzuan kategorikisht kërkesën e Uashingtonit për të ndihmuar në rihapjen e Ngushticës së Hormuzit.
Përplasja diplomatike u përshkallëzua me një postim në Truth Social ku Trump shkroi: “NUK KEMI NEVOJË PËR NDIHMËN E ASKUJT!”. Ai sulmoi edhe Presidentin francez Emmanuel Macron, duke parashikuar se ai “do të largohet shumë shpejt nga zyra”, pasi Parisi deklaroi se nuk do të bëhet palë në konflikt. Ndërkohë, Irani vazhdon të mbajë të mbyllur arterien kryesore ku kalon një e pesta e naftës globale, duke shkaktuar një krizë energjetike që po dridh tregjet botërore.
Në terren, lufta po bëhet gjithnjë e më e përgjakshme. Edhe pse Izraeli raportoi vrasjen e dy komandantëve të lartë iranianë, bilanci për ushtrinë amerikane është i rëndë: 13 ushtarë të vrarë dhe mbi 200 të plagosur në shtatë shtete të ndryshme. Burime brenda Shtëpisë së Bardhë pranojnë se Irani tani mban “kartat e forta” në dorë, duke diktuar kohëzgjatjen e konfliktit dhe rrezikuar tërheqjen e Amerikës në një luftë tokësore pa fund.
Situata ka shkaktuar përçarje edhe brenda lëvizjes MAGA. Figura si Tucker Carlson po shprehin shqetësim për përfshirjen në një luftë tjetër në Lindjen e Mesme, ndërsa Megyn Kelly mbron pozicionin e Presidentit. Me afrimin e zgjedhjeve të mesmandatit dhe rritjen e kostos së jetesës për shkak të çmimit të naftës, Trump po përballet me presionin më të madh që nga kthimi i tij në pushtet.
Kaja Kallas, shefja e politikës së jashtme të Bashkimit Evropian, paralajmëroi se luftërat janë më të lehta për t’u filluar sesa për t’u ndalur. Derisa aleatët evropianë insistojnë në diplomaci për të “shpëtuar fytyrën” e të gjitha palëve, Trump duket i vendosur të vazhdojë i vetëm, duke i quajtur partnerët e NATO-s si një “rrugë me një drejtim” që vetëm merr nga Amerika.
