Presidenti i SHBA, Donald Trump ka akuzuar atë të Ukrainës, Volodymyr Zelensky për dëmtim të negociatave të paqes.
Kjo akuzë vjen pasi presidenti ukrainas tha se Kievi nuk do të njihte kontrollin rus të Krimesë.
Duke shkruar në Truth Social, Trump pretendoi se një marrëveshje për t’i dhënë fund luftës ishte “shumë afër”, por se refuzimi i Zelensky për të pranuar kushtet e SHBA “nuk do të bëjë gjë tjetër veçse të zgjasë” konfliktin.
Ukraina ka thënë prej kohësh se nuk do të heqë dorë nga Krimea, e cila u aneksua ilegalisht nga Rusia në vitin 2014.
Njohja e okupimit të paligjshëm të Krimesë nga Rusia nuk do të ishte vetëm politikisht e pamundur që Zelensky ta pranonte, por do të ishte gjithashtu në kundërshtim me normat ligjore ndërkombëtare të pasluftës që kufijtë nuk duhet të ndryshohen me forcë.
