Një incident i rëndë është regjistruar mbrëmë në fshatin Binçë të Vitisë, ku një kontroll rutinë policor ka eskaluar në përplasje fizike, duke lënë të lënduar dy zyrtarë policorë.
Sipas njoftimit zyrtar të Policisë së Kosovës, ngjarja ka ndodhur pasi njësitet policore kanë ndaluar një automjet me targa lokale, të cilin e drejtonte një shtetas shqiptar nga Maqedonia e Veriut. Gjatë kontrollit të automjetit, zyrtarët konstatuan se personi në fjalë po transportonte drunj, për të cilët dyshohet se ishin prerë dhe po transportoheshin në mënyrë të paligjshme.
“Nga zyrtarët policorë i dyshuari është urdhëruar që automjeti të shoqërohet në zyrat e pylltarisë, mirëpo i njëjti ka kundërshtuar. Gjatë tentimit për ta arrestuar, dy zyrtarë policorë kanë pësuar lëndime trupore”, thuhet në raportin 24-orësh të Policisë.
Pas incidentit, zyrtarët e lënduar kanë pranuar trajtimin e nevojshëm mjekësor. Sa i përket të dyshuarit, Policia bën me dije se pas intervistimit dhe me vendim të prokurorit, ai është liruar. Rasti tashmë ka kaluar për trajtim të mëtejshëm në procedurë të rregullt.
Ky incident vjen në kohën kur autoritetet kanë rritur monitorimin në zonat pyjore për të parandaluar dëmtimin e mjedisit dhe prerjen ilegale të pyjeve.
