Kryeministri Kurti në Venecia: Diplomimi i studentëve të EMA dhe takimi me diasporën
Storm/Italy: Pas takimeve të zhvilluara në Bruksel me Presidenten e Komisionit Evropian, Ursula von der Leyen, Kryeministri i Kosovës, Albin Kurti, udhëtoi për në Venecia, ku pati një axhendë të ngjeshur me aktivitete (që më shumë i ngjajnë para-elektorale).
Kurti zhvilloi një takim me diasporën shqiptare, ku diskutoi për progresin e qeverisë gjatë tre viteve e gjysmë të fundit, duke vlerësuar kontributin e madh të mërgatës në zhvillimin e vendit. Ai theksoi rëndësinë e projekteve të përbashkëta si “Shkolla për Diplomaci të Diasporës” dhe “Dritare për Investime të Diasporës” , që kanë një impakt të drejtpërdrejtë në përmirësimin e mirëqenies ekonomike dhe politike të Kosovës – (që nuk ka të dhëna të konfirmuara, për ndikimin e tyre, as në investime nëse kanë ndodhur, e as për shkollim).
Gjithashtu, Kryeministri vizitoi “Pavijonin e Kosovës” në Bienalen e Artit të Venecias, i cili këtë vit u vlerësua me “Mirënjohje të Veçantë” për instalacionin artistik të Doruntinë Kastratit, duke nxjerrë në pah vlerat artistike dhe kulturore të Kosovës në skenën ndërkombëtare. Kurti shprehu krenarinë e tij për këtë sukses dhe i ftoi të gjithë vizitorët të përjetojnë këtë pjesë të rëndësishme të jetës artistike në Venecia.
Vizita (elekotrale) përmbyllëse e Kryeministrit në Venecia ishte në “ceremoninë e diplomimit të studentëve të Programit Evropian të Masterit në të Drejtat e Njeriut dhe Demokratizimin (EMA)”, ku ai mbajti një fjalim, duke vënë theksin në rëndësinë historike të përvjetorit të 75-të të miratimit të Deklaratës Universale të të Drejtave të Njeriut. Ai përmendi edhe lidhjet e fuqishme që programi EMA ka pasur me Kosovën, duke theksuar se për 20 vite me radhë studentët kanë vizituar vendin tonë për të mësuar mbi përpjekjet dhe arritjet e Kosovës që nga çlirimi.
