Kryeministri në detyrë, Albin Kurti, nuk ka pranuar të japë një përgjigje të qartë lidhur me sigurimin e votave për miratimin e raportit për verifikimin e mandatit të deputetëve dhe zgjedhjen e kryetarit të Kuvendit, në vazhdimin e seancës konstituive që pritet të mbahet nesër.
I pyetur nga gazetarët gjatë një aktiviteti publik, Kurti u shpreh shkurtimisht: “Ajo është nesër a po?”
Deklarata e tij u bë në sheshin “Zahir Pajaziti” në Prishtinë, ku ai mori pjesë në shënimin e Ditës së Dëshmorëve të Komunës së Prishtinës.
Me këtë rast, Kurti u bashkua në një aksion simbolik për dhurim gjaku dhe vendosi lule pranë shtatores së heroit Zahir Pajaziti, duke nderuar kujtimin e dëshmorëve të kombit.
Dy herë dështoi
Seanca konstituive e Kuvendit të Kosovës është ndërprerë për dy herë, duke penguar formimin e institucioneve. Pas “dorëheqjes” të Qeverisë nga Albin Kurti dhe kabineti qeveritar më 23 mars, kontestimet nga opozita kanë çuar në bllokimin e verifikimit të mandateve të deputetëve.
Akuza, interpretime dhe bllokadë
PDK, LDK dhe AAK refuzuan dorëheqjen në formën që ishte dhënë dhe votuan kundër procesit, duke e pamundësuar konstituimin e Kuvendit më 15 prill. Edhe tentativa e dytë më 17 prill për vazhdimin e seancës konstituive nuk dha rezultat dhe seanca u shty për më 19 prill.
Ky ngërç ka krijuar tensione, me LVV-në që akuzon opozitën për bllokim, ndërsa opozita pretendon se LVV po e përdor këtë situatë për pazare politike.
Formimi i Qeverisë është bllokuar deri në përfundimin e konstituimit të Kuvendit.
