Gjykata Themelore në Prishtinë, Departamenti i Krimeve të Rënda, ka caktuar masën e paraburgimit për një muaj ndaj të pandehurit T.K., për shkak të dyshimit të bazuar se ka kryer veprën penale “Vrasje e Rëndë”.
Sipas aktvendimit, mes datës 03.08.2025 dhe 04.08.2025, në fshatin Baicë të Lipjanit, T.K., në bashkëkryerje edhe me persona të paidentifikuar, ka privuar nga jeta të ndjerin E.B. Pas ngjarjes, trupi i viktimës u gjet i groposur në një arë misri, ku ishte mbuluar me dërrasa dhe me dhe, duke rivendosur rrënjët e misrit mbi të.
Gjykata ka vlerësuar se ekziston rreziku i arratisjes së të pandehurit dhe i ndikimit tek dëshmitarët dhe bashkëkryerësit potencialë, si dhe mundësia e fshehjes apo manipulimit të provave. Po ashtu, duke marrë parasysh peshën e veprës, mënyrën dhe rrethanat e kryerjes, si dhe të kaluarën kriminale të të pandehurit, gjykata ka konsideruar se paraburgimi është masa më adekuate në këtë fazë të procedurës.
Palët e pakënaqura kanë të drejtë të ankohen në Gjykatën e Apelit përmes Gjykatës Themelore në Prishtinë.
