Lëvizja Vetëvendosje ka pranuar ftesën e presidentes Vjosa Osmani për pjesëmarrje në takimin konsultativ lidhur me zhvillimet e fundit politike në vend.
Lajmin e ka konfirmuar deputetja e VV-së, Mimoza Kusari-Lila, e cila tha se kryeministri Albin Kurti e ka marrë ftesën dhe se përgjigjja për pjesëmarrje në takim është pozitive.
“Po, Kurti ka marrë ftesë dhe besoj se përgjigjja është pozitive për marrjen pjesë në takim. Do të diskutohet ky proces këtu që po dështon. Zgjidhja është shumë e qartë, e kemi dhënë atë propozim edhe në takimet konsultative dhe kryeministri Kurti i ka dërguar ftesë dy kryetareve të dy partive politike, LDK dhe PDK,” deklaroi Kusari-Lila.
Ajo theksoi se propozimi i Vetëvendosjes për zgjidhjen e krizës aktuale politike është ende në tavolinë dhe duhet të trajtohet me seriozitet nga të gjitha palët e përfshira.
Kjo ftesë e presidentes Osmani vjen pas bllokadës institucionale që ka paralizuar funksionimin normal të Kuvendit dhe proceseve të tjera demokratike në vend, si pasojë e mospajtimeve ndërmjet partive politike për mënyrën e daljes nga ngërçi aktual.
