Presidenti i sapozgjedhur Donald Trump do të ishte dënuar për përpjekje të paligjshme për të përmbysur rezultatet e zgjedhjeve presidenciale të vitit 2020 nëse nuk do të zgjidhej, thuhet në raportin e Departamentit të Drejtësisë të publikuar në Kongres.
“Provat e pranueshme ishin të mjaftueshme për të marrë dhe mbështetur një dënim në gjyq”, thuhet në raportin e përgatitur nga Prokurori Special Jack Smith.
“Smith është “i çmendur” dhe gjetjet e tij janë “të rreme”, tha Trump pas publikimit të raportit.
Dokumenti prej 137 faqesh iu dërgua Kongresit pasi gjyqtarja Aileen Cannon hapi rrugën për publikimin e pjesës së parë nga dy pjesët e raportit të Smith – mbi çështjen e ndërhyrjes në zgjedhje.
Ajo urdhëroi një seancë dëgjimore më vonë gjatë javës nëse do të publikohej pjesa e raportit mbi pretendimet se Trump mbante në mënyrë të paligjshme dokumente të klasifikuara qeveritare.
Publikimi i tij ndodh pak ditë para se presidenti i zgjedhur të marr detyrën.
Prokurori i posaçëm, Jack Smith dha dorëheqjen nga posti i tij javën e kaluar.
Smith u emërua në vitin 2022 për të mbikëqyrur hetimet e Departamentit të Drejtësisë të SHBA ndaj Trump.
Trump u akuzua për mbajtjen e paligjshme të dokumenteve dhe, në disa raste, ruajtjen e tyre në dhomat në resortin Mar-a-Lago në Florida, rezidenca që ai zotëron. Në çështjen e ndërhyrjes, ai u akuzua për komplot për të përmbysur rezultatin e zgjedhjeve të vitit 2020.
Të dyja rastet rezultuan në kallëzime penale kundër Trump, i cili u deklarua i pafajshëm dhe kërkoi t’i shpallte ndjekjet penale si të motivuara politikisht.
Por Smith mbylli çështjet pas zgjedhjes së Trump në nëntor, në përputhje me rregulloret e Departamentit të Drejtësisë që ndalojnë ndjekjen penale të një presidenti në detyrë.
“Pikëpamja e departamentit [të drejtësisë] se Kushtetuta ndalon vazhdimin e aktakuzës dhe ndjekjes penale të një presidenti është kategorik dhe nuk e kthen në peshën e krimeve të akuzuara, forcën e provës së qeverisë. apo meritat e prokurorisë, pas së cilës zyra qëndron plotësisht”, thuhet tutje në raportin e publikuar të Smith.
