Hungaria është tërhequr nga kërcënimi se do ta vë veto në votimin e BE-së për rinovimin e sanksioneve kundër Rusisë për gjashtë muaj të tjerë, duke i dhënë fund sagës politike jetëshkurtër që e kishte vënë Brukselin në rrezik.
Përparimi u arrit gjatë një takimi të ministrave të punëve të jashtme ku u paraqit një deklaratë për “integritetin e infrastrukturës së energjisë” për të qetësuar shqetësimet e Budapestit, thanë disa diplomatë për Euronews.
Zgjatja “do të vazhdojë të privojë Moskën nga të ardhurat për të financuar luftën e saj. Rusia duhet të paguajë për dëmin që po shkakton”, tha Përfaqësuesja e Lartë Kaja Kallas.
Sanksionet sektoriale, të cilat përfshijnë ndalime gjithëpërfshirëse për naftën, qymyrin, teknologjinë, financat, mallrat luksoze, transportin dhe transmetimin, si dhe ngrirjen e 210 miliardë eurove në asete nga Banka Qendrore e Rusisë, do të përfundonin më 31 janar, nëse nuk u gjet unanimitet.
Në ditët përpara afatit vendimtar, Hungaria rriti retorikën e saj kritike, duke argumentuar se inaugurimi i Donald Trump si president i SHBA-së meritonte një rishikim më të gjerë të politikës së bllokut dhe mënyrës se si sanksionet rinovohen çdo gjashtë muaj.
“Ka gaz, ka rrugë furnizimi nga Azerbajxhani. Çelësi është të kesh vullnet politik për të punuar për popullin tënd, jo me Moskën për ndonjë përfitim të fshehtë, siç bëjnë disa figura në Evropën Lindore”, tha Zelenskyy të shtunën gjatë një konference për shtyp me presidenten moldave Maia Sandu.
Si vende pa dalje në det, Hungaria dhe Sllovakia kanë shtyrë fort për vazhdimin e tranzitit përmes Ukrainës, qoftë me gaz rus apo azerbajxhanas, duke paralajmëruar se ekonomitë e tyre kombëtare do të shkatërroheshin nga ndryshimi i menjëhershëm në furnizimet me energji.
Komisioni Evropian, i cili i dha miratimin e heshtur vendimit të Zelenskyy për të ndërprerë kontratën afatgjatë me Gazprom, këmbëngul se ndikimi do të jetë i kufizuar sepse BE-ja është e përgatitur mirë për t’u larguar nga karburantet ruse.
