Hakerët kinezë kanë arritur të hyjnë në rrjetet e disa kompanive të telefonisë nga ku morën informacion nga sistemet që qeveria federale përdor për përgjime të autorizuara nga gjykata, raporton mediumi amerikan Wall Street Journal.
Kompanitë Verizon Communications, AT&T dhe Lumen Technologies, janë ndër kompanitë e telekomunikacionit, rrjetet e të cilave u shkelën nga ndërhyrja e zbuluar së fundmi, shkroi mediumi, duke cituar zyrtarë që kishin njohuri me këtë çështje.
Hakerët mund të kenë pasur akses për muaj në infrastrukturën e rrjetit të përdorur nga kompanitë, si pjesë e bashkëpunimit bazuar në kërkesat e SHBA-së, të autorizuara nga gjykata për të dhëna komunikimi.
Një zyrtar tha se hakerët kishin aksesuar gjithashtu pjesë të tjera të trafikut të internetit.
Ministria e Jashtme e Kinës nuk iu përgjigj një kërkese të Reuters rreth këtyre akuzave.
Në të kaluarën, Pekini ka mohuar pretendimet e qeverisë amerikane dhe të tjerëve se ka përdorur hakerë për të depërtuar në sistemet e huaja kompjuterike.
Wall Street Journal tha se sulmi u krye nga një grup hakerësh kinez me qëllim të mbledhjes së informatave nga inteligjenca.
Hetuesit amerikanë e kanë quajtur atë “Salt Typhoon”.
Në fillim të këtij viti, forcat e rendit të SHBA-së arritën të godasin një grup të madh hakerësh kinez me nofkën “Tajfuni i Lirit”.
