Presidenti ukrainas, do të arrij në Paris për bisedime me presidentin francez Emmanuel Macron, ku pritet të nënshkruhet marrëveshja për aviacionin.
Vizita e Zelenskyt po ndodh në kohën kur sulmet e rënda me dronë dhe raketa ruse ndaj Ukrainës janë shtuar në javët e fundit dhe Moska ka raportuar përparime të ndjeshme tokësore në rajonin juglindor të Zaporizhzhisë.
“Një marrëveshje historike është përgatitur gjithashtu me Francën – do të ketë një forcim të ndjeshëm të aviacionit tonë luftarak, mbrojtjes ajrore dhe aftësive të tjera mbrojtëse. Sipas orarit të vizitës, kjo do të zhvillohet të hënën”, tha Zelensky në një postim në X të dielën.
Ka pasur bisedime për disa javë për të parë se si Franca mund të ofrojë më shumë mbështetje ushtarake për mbrojtjen ajrore të Kievit, pavarësisht paqëndrueshmërisë politike dhe buxhetore në Paris, e cila ka ngritur pikëpyetje se sa mund të bëjë në të vërtetë Franca.
Macron u zotua muajin e kaluar të ofrojë më shumë avionë luftarakë Mirage, pasi fillimisht premtoi të dorëzonte gjashtë dhe një grup të ri raketash tokë-ajër Aster 30, të prodhuara nga grupi evropian MBDA, për bateritë e mbrojtjes ajrore SAMP/T të operuara nga Kievi.
Por sipas dy personave të informuar mbi këtë çështje, vizita e së hënës do të sjellë më shumë për Kievin. Ajo mund të përfshijë një marrëveshje 10-vjeçare të aviacionit strategjik që do të sinjalizonte furnizimin e Kievit me avionë luftarakë Rafale shumërolësh, të prodhuar nga Dassault.
Disa mund të vijnë direkt nga stoqet franceze, megjithëse pjesa më e madhe do të ishte afatgjatë dhe pjesë e përpjekjeve të Ukrainës për të rritur flotën e saj afatgjatë në 250 avionë luftarakë, duke përfshirë F-16 amerikan dhe Gripen të Suedisë.
Operimi i avionëve të përparuar do të kërkonte kohë, duke pasur parasysh programin rigoroz të trajnimit për pilotët e ardhshëm.
Të dy burimet thanë se të hënën mund të shihen gjithashtu marrëveshje për më shumë sisteme të mbrojtjes ajrore SAMP/T, nga stoqet ekzistuese franceze ose përmes porosive afatgjata të gjeneratës së ardhshme, duke përfshirë raketa dhe sisteme anti-dronë.
Burimet shtuan se nuk ishte e qartë se si do të financoheshin këto marrëveshje.
Në një konferencë për mediat përpara vizitës së Zelensky-t, zyra e Macron tha se qëllimi ishte “të vihej në shërbim të mbrojtjes së Ukrainës përsosmëria franceze në industrinë e armëve” dhe “t’i mundësohej asaj të siguronte sistemet që i nevojiten për t’iu përgjigjur agresionit rus”.
Zelensky do të marrë pjesë në një takim informues nga prodhues të ndryshëm, përfshirë Dassault, të hënën në mëngjes përpara se të nënshkruajë një letër qëllimi dhe kontrata më vonë gjatë ditës, sipas një orari të presidencës franceze që nuk dha detaje specifike.
Një forum i veçantë në pasdite do të bashkojë firmat ukrainase dhe franceze që punojnë në sektorin e dronëve për të parë se si mund t’i kombinojnë përpjekjet e tyre.
Franca, së bashku me Britaninë, ka kërkuar krijimin e një koalicioni prej rreth 30 vendesh, të gatshme të dërgojnë trupa dhe asete në Ukrainë ose përgjatë kufijve të saj perëndimorë, sapo të arrihet një marrëveshje paqeje me Rusinë.
Një objektiv kryesor është të sigurohet që Ukraina të ketë ndihmë të mjaftueshme ushtarake dhe ekonomike afatgjatë për ta mbajtur ushtrinë e saj mjaftueshëm të fortë për të penguar çdo sulm të ardhshëm rus.
