Presidenti ukrainas paralajmëroi se pa veprime më të forta nga aleatët, “Putini do ta çojë luftën përpara, gjithnjë e më thellë”, dhe tha se “Ukraina është vetëm e para”.
Presidenti ukrainas kritikoi dobësinë e institucioneve ndërkombëtare për dështimin në frenimin e Rusisë.
Ai tha se “ndalimi i Putinit tani është më i lirë” sesa përpjekjet e vendeve për të mbrojtur veten nga Rusia më vonë.
Zelensky tha se pati një “takim të mirë” me Donald Trump të martën, por ndërsa e vlerëson mbështetjen e SHBA-së, “në fund të fundit, paqja varet nga të gjithë ne”.
Ai paralajmëron se Putini “do të vazhdojë ta çojë luftën përpara, gjithnjë e më thellë” nëse nuk ndalet.
Ai thotë se u takon atyre që janë të pranishëm në Asamblenë e Përgjithshme të OKB-së të sigurohen që fëmijët e rrëmbyer të mund të kthehen në shtëpi, të burgosurit e luftës të lirohen dhe pengjet të jenë në gjendje të kthehen.
“Mos heshtni ndërsa Rusia vazhdon ta zvarrisë këtë luftë, ju lutem flisni hapur dhe dënoni atë”, shton ai.
Ndërkohë pasdite, mediat ruse kanë raportuar se ministri i jashtëm rus, Sergei Lavrov, ka zhvilluar bisedime me homologun e tij amerikan.
Kremlini informoi më parë se ai pritej të takohej me Sekretarin e Shtetit, Marco Rubio në margjinat e Asamblesë së Përgjithshme të OKB-së.
Bisedimet ballë për ballë vijnë pasi Donald Trump sinjalizoi dje një ndryshim të dukshëm në qëndrimin e tij ndaj luftës në Ukrainë, duke thënë se tani beson se Kievi mund të rimarrë plotësisht territorin e pushtuar nga Rusia.
Asnjëra palë nuk ka publikuar detaje të mëtejshme për atë që diskutuan Lavrov dhe Rubio – do t’ju sjellim më shumë nëse i kemi në dispozicion.
