Ukraina i dorëzoi dje SHBA-së versionin e saj të përditësuar të planit të paqes, konfirmoi Volodymyr Zelenskyy.
Ai tha se çështjet territoriale mbeten ende “nën diskutim” dhe sugjeroi se ukrainasit duhet të kenë të drejtë fjale për çdo lëshim toke nëpërmjet një referendumi.
Zelenskyy shtoi se SHBA-të kanë propozuar krijimin e një “zone të lirë ekonomike” në zonën e Donbasit nga e cila duan që Ukraina të tërhiqet.
Ai deklaroi se po diskutohen edhe tërheqjet ruse nga copëza toke në rajonet Kharkiv, Sumy dhe Dnipro.
Ai gjithashtu mohoi ekzistencën e një afati të imponuar nga SHBA-të për Krishtlindje, duke thënë në vend të kësaj se Uashingtoni dëshiron vetëm një “mirëkuptim mbi statusin” deri atëherë.
Këto komente u bën pasi Volodymyr Zelenskyy dhe ekipi i tij zhvilluan sot një tjetër diskutim me të dërguarit më të rëndësishëm të Donald Trump.
Të dyja palët diskutuan garancitë e sigurisë, subjekt i njërit prej tri dokumenteve që aktualisht përbëjnë planin më të gjerë amerikan të paqes për Ukrainën.
Marco Rubio, Pete Hegseth, Steve Witkoff, Jared Kushner dhe tre zyrtarë ushtarakë amerikanë ishin të pranishëm, si dhe sekretari i përgjithshëm i NATO-s, Mark Rutte.
“Ne e vlerësojmë shumë punën aktive të palës amerikane në nivele të ndryshme”, shkroi Zelenskyy.
“Kjo tregon seriozitetin e qëllimeve të Amerikës dhe angazhimin e saj për të arritur rezultate”.
Dje, Zelenskyy kishte diskutuar një dokument tjetër, mbi rindërtimin e Ukrainës, me zyrtarët amerikanë.
Ai gjithashtu dërgoi dje në Uashington dokumentin e parë, një kornizë paqeje prej 20 pikash.
