Ekipet ndërkombëtare që kërkojnë trupat e pengjeve janë lejuar të kalojnë kufirin ushtarak të Izraelit në Gaza, njoftoi një zëdhënës i qeverisë izraelite.
“Izraeli është i vetëdijshëm se Hamasi e di në fakt se ku ndodhen pengjet tona të ndjera. Nëse Hamasi do të bënte më shumë përpjekje, do të ishte në gjendje të merrte eshtrat e pengjeve tona”, tha zëdhënësi i qeverisë të dielën.
Kufiri ushtarak, i referuar shpesh si “vija e verdhë”, është një kufi për trupat e Forcave Mbrojtëse të Izraelit (IDF) në Gaza, i vendosur nga marrëveshja e armëpushimit.
Armëpushimi i brishtë, i ndërmjetësuar nga SHBA-të, mbështetet në kthimin nga Hamasi të të gjitha mbetjeve mortore të pengjeve izraelite sa më shpejt të jetë e mundur, por në pesë ditët e fundit, asnjë trup nuk është liruar.
Të shtunën, ekipi egjiptian mbërriti me një ekskavator dhe buldozerë për të ndihmuar në kërkimin e trupave, si pjesë e përpjekjeve të ndërmjetësve ndërkombëtarë për t’u siguruar që armëpushimi të respektohet.
Trupat e 13 pengjeve mbeten në Gaza, me kreun e Hamasit Khalil al Hayya që tha se grupi ka filluar kërkimet në zona të reja të dielën në mëngjes.
Si pjesë e marrëveshjes së armëpushimit, Izraeli ra dakord të kthejë 15 trupa palestinezë për çdo trup pengjesh.
Izraeli ka kthyer tani trupat e 195 palestinezëve, ndërsa Hamasi ka kthyer 15 trupa pengjesh.
Presidenti i SHBA-së, Donald Trump, paralajmëroi se po “vëzhgon nga afër” për t’u siguruar që Hamasi të kthejë më shumë trupa.
“Disa nga trupat janë të vështirë për t’u arritur, por të tjerët mund të kthehen tani dhe, për ndonjë arsye. Le të shohim se çfarë do të bëjnë gjatë 48 orëve të ardhshme. Po e ndjek këtë nga shumë afër”, shkroi ai në Truth Social.
