Për shkak të zjarreve të përhapura në disa rajone të vendit, sistemi energjetik i Kosovës është vënë përballë një sfide serioze që kërkoi ndërhyrje të menjëhershme dhe masa mbrojtëse.
Në kuadër të masave parandaluese dhe me qëllim mbrojtjen e infrastrukturës kritike, KOSTT ka realizuar ndërprerjen e përkohshme të energjisë elektrike në Nënstacionin Prizreni 1 dhe Prizreni 3, me urdhër të Policisë së Kosovës dhe në koordinim me autoritetet përkatëse.
“Këto veprime janë ndërmarrë për të garantuar sigurinë e operimit të rrjetit dhe për të mbrojtur jetën e ekipeve të zjarrfikësve që janë të angazhuar në terren,” thuhet në njoftimin zyrtar të KOSTT-it.
Autoritetet konfirmojnë se situata është nën kontroll, dhe se po trajtohet me kujdes të shtuar në bashkëpunim me ekipet teknike të KEDS-it, me qëllim rikthimin sa më të shpejtë dhe të sigurt të energjisë elektrike në zonat e prekura.
KOSTT u ka bërë thirrje qytetarëve për mirëkuptim dhe ka garantuar se do të bëhen të gjitha përpjekjet për minimizimin e pasojave dhe normalizimin e plotë të furnizimit me energji elektrike.
