Zëvendëspresidenti i SHBA-së JD Vance, i dërguari special Steve Witkoff dhe këshilltari Jared Kushner, do të takohen me kryeministrin izraelit Benjamin Netanyahu për të shtyrë përpara planin e paqes me 20 pika të Trump.
Takimi vjen pas luftimeve vdekjeprurëse në Gaza të dielën, zemërimit të Izraelit për pamundësinë e Hamasit për të kthyer shpejt trupat e pengjeve të vdekura dhe akuzave të SHBA-së ndaj grupit palestinez për sulmin ndaj njerëzve në Gaza.
Gjatë vikendit, presidenti i SHBA-së, Donald Trump, ka thënë se armëpushimi është ende në fuqi, duke shtuar se “do të trajtohet me ashpërsi, por siç duhet”.
Jared Kushner ka shprehur bindjen e tij se Hamasi po kërkon seriozisht trupat dhe se ka “respektuar marrëveshjen e tyre”.
Kurse, JD Vance tha se ruajtja e paqes midis të dyja palëve “do të ketë kodra dhe lugina”, por ai ende mendon se “ka shanset më të mira”.
Gjatë mëngjesit të së hënës, Hamasi njoftoi se ka gjetur një tjetër trup të një pengu izraelit në Gaza.
Krahu ushtarak i grupit, Brigadat al-Qassam, u zotua më 19 tetor se do ta dorëzonte trupin në të njëjtën ditë “nëse kushtet në terren e lejojnë”.
Megjithatë, duket se transferimi nuk ka ndodhur ende.
Ndërkohë, zyrtarët izraelitë njoftuan se do të rihapin dy kalime për të lejuar kamionët me ndihma të kthehen në Gaza.
Kalimet janë Kerem Shalom, në juglindje të largët të rripit kufitar, dhe Kissufim në Gazën qendrore.
