Një numër dronësh të paidentifikuar janë parë mbi tri bazat ajrore në Britani, ka konfirmuar Forca Ajrore e Shteteve të Bashkuara (USAF).
Incidentet, të cilat ndodhën mes të mërkurës dhe të premtes, panë “sisteme të vogla ajrore pa pilot” të pikasur mbi RAF Lakenheath dhe RAF Mildenhall, në Suffolk dhe RAF Feltwell në qarkun fqinj të Norfolk.
USAF, e cila përdor bazat, tha se ishte e paqartë në këtë fazë nëse dronët konsideroheshin armiqësorë.
Gjithashtu nuk pranoi të komentonte nëse ishte përdorur ndonjë mekanizëm mbrojtës, por tha se ruante “të drejtën për të mbrojtur” instalimet.
“Ne mund të konfirmojmë se sisteme të vogla ajrore pa pilot [UAS] u vunë re në afërsi dhe mbi RAF Lakenheath, RAF Mildenhall dhe RAF Feltwell. Numri i UAS-ve luhatej dhe ato varionin në madhësi/konfigurim. UAS-et u monitoruan në mënyrë aktive dhe drejtuesit e instalimit përcaktuan se asnjë nga inkursionet nuk ndikoi banorët e bazës ose infrastrukturën kritike. Për të mbrojtur sigurinë operacionale, ne nuk diskutojmë masat tona specifike të mbrojtjes së forcës, por ruajmë të drejtën për të mbrojtur instalimin. Ne vazhdojmë të monitorojmë hapësirën tonë ajrore dhe po punojmë me autoritetet e vendit pritës dhe partnerët e misionit për të garantuar sigurinë e personelit të bazës, objekteve dhe aseteve”, deklaroi për BBC, një zëdhënës i USAF për Evropë.
RAF Mildenhall është kryesisht shtëpia e krahut të 100-të të karburantit ajror të USAF; RAF Lakenheath është shtëpia e avionëve luftarakë F-35A dhe F-15E të USAF, ndërsa RAF Feltwell merret kryesisht me logjistikën dhe ofron strehim për personelin ushtarak.
“Ne i marrim kërcënimet seriozisht dhe mbajmë masa të forta në vendet e mbrojtjes. Kjo përfshin aftësitë e sigurisë kundër dronëve. Ne nuk do të komentojmë më tej mbi procedurat e sigurisë”, tha një zëdhënës i Ministrisë Britanike të Mbrojtjes, e cila zotëron bazat.
