Moldavia përballet me një krizë sigurie pasi enklava e saj separatiste Transdniestria u ndërpre nga furnizimet me gaz rus, tha të premten kryeministri Dorin Recean.
Flukset e gazit rus nëpërmjet Ukrainës në Evropën Qendrore dhe Lindore u ndaluan në ditën e Vitit të Ri pasi skadoi një marrëveshje tranziti midis vendeve ndërluftuese dhe Kievi refuzoi të bënte biznes të mëtejshëm me Moskën.
Recean tha se Moldavia do të mbulonte nevojat e veta për energji me prodhimin vendas dhe importet, por vuri në dukje se rajoni separatist i Transdniestrisë kishte pësuar një goditje të dhimbshme pavarësisht lidhjeve të saj me Moskën. Banorët atje kanë humbur ujin e ngrohtë dhe ngrohjen qendrore, dhe të gjitha fabrikat, përveç prodhuesve të ushqimit janë detyruar të ndalojnë prodhimin.
“Duke rrezikuar të ardhmen e protektoratit që ka mbështetur për tri dekada në një përpjekje për të destabilizuar Moldavinë, Rusia po zbulon rezultatin e pashmangshëm për të gjithë aleatët e saj – tradhtinë dhe izolimin”, tha Recean në një deklaratë.
“Ne e trajtojmë këtë si një krizë sigurie që synon të mundësojë kthimin në pushtet të forcave pro-ruse në Moldavi dhe armatimin e territorit tonë kundër Ukrainës, me të cilën kemi një kufi prej 1200 km”.
Presidenti i vetëquajtur i enklavës pro-ruse, Vadim Krasnoselsky, tha se ndërprerjet e vazhdueshme të energjisë tani ishin të pashmangshme për shkak të ndërprerjes së gazit dhe rritjes së kërkesës për energji elektrike.
Krasnoselsky tha më parë se rajoni kishte rezerva gazi për të mbuluar 10 ditë përdorim të kufizuar në veri dhe dy herë më shumë në jug.
Rusia mohon përdorimin e gazit si armë për të detyruar Moldavinë dhe fajëson Kievin për refuzimin e rinovimit të marrëveshjes së tranzitit të gazit.
Gjigandi rus i gazit Gazprom kishte thënë veçmas më 28 dhjetor se do të pezullonte eksportet në Moldavi më 1 janar për shkak të asaj që Rusia thotë se janë borxhe të papaguara moldave prej 709 milionë dollarësh. Moldavia e kundërshton këtë dhe e ka vendosur shifrën në 8.6 milionë dollarë.
