Sot do të përkujtohet 80-vjetori i çlirimit të kampit të përqendrimit dhe shfarosjes naziste të Auschwitz.
Në këtë ceremoni krahas liderëve botërorë merr pjesë edhe Presidentja e Kosovës, Vjosa Osmani, e cila dje ka udhëtuar për Poloni.
Në njoftimin e Presidencës thuhet se gjatë ceremonisë, në përkujtim të viktimave të Holokaustit, me pjesëmarrësit do të ndahen rrëfimet prekëse të dy të mbijetuarve nga kampi i Auschwitz, duke rikujtuar një nga kapitujt më të errët të historisë njerëzore.
“Auschwitz është simbol i Holokaustit dhe mizorive të Luftës së Dytë Botërore. Në vitin 2005, Kombet e Bashkuara shpallën 27 janarin Ditë Ndërkombëtare të Përkujtimit të Holokaustit, për t`i kujtuar viktimat dhe për ta nxitur botën që të angazhohet për të mos lejuar kurrë më përsëritjen e tmerreve të tilla”, thuhet në njoftimin e dërguar nga Presidenca e Kosovës.
