Sekretari amerikan i Shtetit, Marco Rubio dhe Steve Witkoff, i dërguari ndërkombëtar i Presidentit Donald Trump, do të takojnë të enjten zyrtarët ukrainas në Paris në një samit që synon të forcojë mbrojtjen e Ukrainës kundër pushtimit të pandërprerë të Rusisë.
Nëse premtimi i Trump për t’i dhënë fund luftës brenda një dite ishte i largët, shpresa për të siguruar një armëpushim të plotë deri në Pashkë – këtë fundjavë – gjithashtu duket se do të dështojë. Rusia ka shtuar sulmet e saj ndaj Ukrainës në javët e fundit, megjithë propozimet e Uashingtonit ndaj Moskës.
Këto hapa deri më tani kanë lënë mënjanë fuqitë evropiane dhe Kievin, që do të thotë se samiti i së enjtes do të jetë takimi i nivelit më të lartë të zyrtarëve ukrainas dhe amerikanë brenda javësh.
Ministri i Jashtëm dhe ministri i mbrojtjes i Ukrainës mbërritën në kryeqytetin francez për samitin e fundit të “koalicionit të vullnetarëve”, një grup vendesh perëndimore që zotohen të mbrojnë Ukrainën kundër Rusisë përballë mbështetjes ushtarake të SHBA-së në pakësim dhe të pasigurt.
Andriy Yermak, një ndihmës i lartë i Presidentit Volodymyr Zelensky, tha se ministrat “po punojnë për çështje kritike për sigurinë e Ukrainës dhe të gjithë Evropës”.
Për aleatët evropianë të Ukrainës, samiti ofron një shans për të vlerësuar mendimin e administratës Trump për luftën në Ukrainë.
