Ministria e Mbrojtjes e Rusisë tha të dielën se forcat e saj kishin arritur në skajin perëndimor të rajonit të Donetskut, një nga katër provincat që Rusia aneksoi ilegalisht në vitin 2022, dhe se trupat po “zhvillonin ofensivën” në rajonin fqinj të Dnipropetrovskut.
Kjo do të ishte hera e parë që trupat ruse do të hynin në rajon në luftën më shumë se trevjeçare.
Nga ana tjetër Ukraina e ka mohuar këtë pretendim.
Përparimi i Rusisë do të shënonte një pengesë të rëndësishme për forcat tashmë të sforcuara të Ukrainës, ndërsa bisedimet e paqes mbeten të bllokuara dhe trupat ruse kanë bërë përparime graduale gjetkë.
Forcat e Putinit duket se janë gjithashtu vetëm pak kilometra larg qytetit të Sumy-t, tri vjet pasi Ukraina i detyroi të largoheshin nga rajoni verior.
Në zhvillimet tjera, një person u vra dhe një tjetër u plagos rëndë në sulmet ajrore ruse në rajonin lindor të Ukrainës, Kharkiv.
Këto sulme erdhën pas sulmeve ruse që shënjestruan kryeqytetin rajonal të shtunën.
Policia rajonale në Kharkiv tha të dielën se numri i të vdekurve nga sulmet e së shtunës ishte rritur në gjashtë persona. Më shumë se dy duzina të tjerë u plagosën.
Forcat ajrore të Ukrainës thanë të dielën se Rusia qëlloi gjithsej 49 dronë dhe karrem shpërthyes dhe tre raketa gjatë natës. Dyzet dronë u rrëzuan ose u bllokuan elektronikisht.
Ministria e mbrojtjes e Rusisë tha se forcat e saj kanë rrëzuar 61 dronë ukrainas gjatë natës, përfshirë edhe pranë kryeqytetit.
Pesë persona u plagosën të dielën në një sulm me dron ukrainas në një parking në rajonin Belgorod të Rusisë, sipas guvernatorit rajonal Vyacheslav Gladkov.
Dy persona u plagosën kur një sulm me dron ukrainas shkaktoi një zjarr në një fabrikë kimike në rajonin Tula, thanë autoritetet lokale.
Autoritetet ruse thanë të dielën në mëngjes se aeroportet Vnukovo dhe Domodedovo, dy aeroporte ndërkombëtare që i shërbejnë Moskës, pezulluan përkohësisht fluturimet për shkak të një sulmi me dron ukrainas.
Më vonë gjatë ditës, Domodedovo ndaloi përkohësisht fluturimet për herë të dytë, së bashku me aeroportin Zhukovsky.
