Policia ndërhyn pas të shtënave në një dasmë – konfiskon pistoletë dhe gëzhoja, i dyshuari në ndalim për 48 orë.
Një aheng familjar në jug të Mitrovicës është kthyer në skenë hetimesh policore pasi në mesditën e së shtunës janë dëgjuar të shtëna me armë zjarri.
Sipas Policisë, menjëherë pas pranimit të informatës, njësitë policore kanë lokalizuar vendin e ngjarjes dhe kanë ndërmarrë veprime operative. Në një lokacion ku po mbahej një aheng familjar, Policia ka konfiskuar një armë zjarri e llojit pistoletë si dhe shtatë gëzhoja, të cilat u gjetën në vendin e ngjarjes.
I dyshuari, B. A., 30 vjeçar dhe shtetas i Republikës së Kosovës, është shoqëruar për intervistim dhe ndaj tij është shqiptuar masa e ndalimit për 48 orë, me vendim të prokurorit kompetent.
Ndaj tij është iniciuar procedurë për veprat penale: “Mbajtje në pronësi, kontroll, posedim të paautorizuar të armës” dhe “Përdorim i armës”.
