Policia franceze arrestoi 473 persona të mërkurën, ndërsa protestuesit e lëvizjes “Blloko Gjithçka”, u përpoqën të paralizonin transportin dhe jetën e përditshme në të gjithë Francën, dy ditë pasi qeveria e kryeministrit François Bayrou u rrëzua për shkak të masave të kursimit.
Sipas Ministrisë së Brendshme, deri në fund të pasdites në të gjithë Francën u regjistruan 200,000 pjesëmarrës. Megjithatë, sindikata më e madhe e punës në vend, CGT, pretendoi se morën pjesë më shumë se 250,000 persona.
Deri në orën 6 të mbrëmjes së së mërkurës, ishin regjistruar 812 veprime, duke përfshirë 550 tubime dhe 262 bllokada. Trembëdhjetë anëtarë të forcave të sigurisë thuhet se u lënduan lehtë.
Autoritetet vendosën 80,000 oficerë policie dhe xhandarë, ndërsa mijëra demonstrues dolën në rrugët e Parisit dhe qyteteve të tjera në të gjithë Francën.
Natyra pa udhëheqës e protestave bëri që grupe të ndryshme demonstruesish të organizonin veprime të ndryshme në të gjithë kryeqytetin, por u shpërndanë shpejt nga policia.
Disa ndezën zjarre, ndërtuan barrikada dhe u përpoqën të bllokonin unazën e Parisit, autostradën urbane më të ngarkuar të Evropës.
Herët në mëngjes, protestuesit i vunë flakën kazanëve të mbeturinave dhe u përpoqën të bllokonin shinat e tramvajit rreth Porte de Montreuil në lindje të Parisit, përpara se policia t’i hiqte pengesat dhe të shpërndante turmat.
Demonstruesit gjithashtu hynë me forcë në autostradë në përpjekje për të bllokuar trafikun, por u ndaluan gjithashtu nga forcat e rendit.
Pas një takimi të njësisë ndërministrore të krizës, Ministri i Brendshëm në largim Bruno Retailleau i quajti veprimet e së mërkurës një “disfatë për ata që donin ta çonin vendin në një ngërç”.
Tensionet u përshkallëzuan rreth stacionit hekurudhor Gare du Nord të Parisit, një nga stacionet më të ngarkuara të trenave në Evropë.
Policia mbylli hyrjen në stacionin hekurudhor më herët të mërkurën, ndërsa protestuesit u përpoqën të hynin me forcë.
Protestat më të mëdha u regjistruan rreth Place du Chatelet dhe Place des Fêtes dhe ishin relativisht të qeta. Por zemërimi mbeti i prekshëm gjatë gjithë ditës.
