Më 14 tetor të vitit 1929, u nda nga jeta rilindasi, etnologu, shkrimtari, arkeologu dhe kleriku at Shtjefën Gjeçovi.
Pas përfundimit të kolegjit françeskan në Troshan në vitin 1888, ai vazhdoi studimet në Kroaci. Në vitin 1896 u dorëzua prift dhe më pas shërbeu në Theth, Pejë, Gomsiqe e zona të tjera.
At Shtjefën Gjeçovi dha një kontribut të çmuar në mbledhjen e gojëdhënave dhe hartimin e disa monografive shkencore. Përveç kësaj, ai përktheu edhe disa vepra të rëndësishme të letërsisë botërore.
Ndihmesën më të madhe e dha në fushën e etnologjisë, me veprën monumentale “Kanuni i Lekë Dukagjinit”. Për përgatitjen e saj, mblodhi rregullat nga goja e popullit në gjithë trevat veriore ku kishte shërbyer si prift, dhe i përpunoi në një përmbledhje që fillimisht u botua në revistën “Hylli i Dritës”.
At Shtjefën Gjeçovi punoi edhe si mësues për përhapjen e gjuhës shqipe. Për shkak të veprimtarisë së tij patriotike dhe në shërbim të çështjes kombëtare, më 14 tetor të vitit 1929 u vra në një pritë të organizuar nga persona të paidentifikuar në shërbim të pushtetit jugosllav.
