Me një dolli nga një grua, është kremtuar shpallja e dollisë shqiptare si pjesë e pasurisë kombëtare të trashëgimisë kulturore jo materiale.
Grupi nismëtar që propozoi vlerësimin e ritit, i kushtoi një pasdite tematike, ku të pranishmit vunë në dukje veçantitë e dollisë dhe dallimet që ka ajo nga zona në zonë.
Sherif Bundo, autor i librit “Dollia shqiptare, institucioni shpirtëror i mikpritjes” bëri dallimin mes dollisë dhe kodit të komunikimit që ajo përfshin dhe dehjes si tejkalim i masës së konsumit çka në të kundërt të dollisë është fyerje.
Pedagogë, shkrimtarë e studiues të pranishëm, u ndalën në përvoja personale e kolektive që pasurojnë këndvështrimin mbi dollinë shqiptare dhe ngjashmëritë me ritë të ngjashme jashtë vendit.
Rektori i universitetit “Luarasi”, Ethem Ruka, Niko Kotherja nga Qendra e Veprimtarive Kulturore dhe shkrimtari Namik Dokle, sollën përvoja dhe dije mbi dollinë në Shqipëri e jashtë saj, me ritin Gjeorgjian më të ngjashëm me Shqipërinë.
Dollia shqiptare sipas Bundos, shoqërohet edhe me këngë polifonike. Ndonëse nuk dihet se ku ka lindur dollia, riti i saj në thelb ka lëvdimin dhe nxjerrjen në pah të vlerave më të mira të gjithsecilit. /BalkanWeb
